Tîm Patholeg Gellol yn Gwella Cyflymder Prosesu Samplau Canser
Mae gwaith gwella sydd wedi’i wneud ym Mwrdd Iechyd Prifysgol Aneurin Bevan (BIPAB) wedi cynyddu cyflymder prosesu samplau brys lle mae amheuaeth o ganser yn ei labordy Patholeg Gellol.
Mae'r tîm yn BIPAB yn ymgymryd â'r gwaith fel rhan o'r prosiect Llwybrau Lle Mae Amheuaeth o Ganser. Mae’r prosiect a gaiff ei ariannu gan Rwydwaith Canser GIG Cymru a'i weithredu mewn partneriaeth â Gwelliant Cymru a'r gwneuthurwr cerbydau Toyota, yn cefnogi timau ym mhob rhan o GIG Cymru i leihau’r amser rhwng yr amheuaeth o ganser a’r diagnosis.
Fel rhan o'r prosiect, mynychodd tîm BIPAB hyfforddiant dwys yng Nghanolfan Rheoli Darbodus Toyota yng Nglannau Dyfrdwy, lle buont yn dysgu o System Gynhyrchu Toyota (TPS) y gwneuthurwr ceir sy’n fyd-enwog Yma byddent yn dysgu am effeithiolrwydd dull Methodoleg Ddarbodus Toyota a Muda, gair Japaneaidd sy'n golygu gwastraff – ac yn benodol am amser ac adnoddau yn y cyd-destun hwn.
Anogwyd y tîm i feddwl am bob agwedd ar ei brosesau a'i amgylchedd gwaith a'u cwestiynu. Nod yr ymarfer oedd canfod a lleihau gwastraff a chreu diwylliant darbodus yn y labordy.
Wedi'u hysbrydoli gan yr hyn yr oeddent wedi'i ddysgu yn Toyota, aeth staff yn y Labordy Patholeg Gellol (BIPAB) ati i roi’r dull Methodoleg Ddarbodus ar waith. Dechreuon nhw drwy edrych ar eu proses o ddadansoddi samplau meinwe i adnabod canser y fron, y croen a'r ysgyfaint. Wrth edrych ar y data dros gyfnod o sawl mis, nododd y tîm mai dim ond ffracsiwn o'r samplau cyfan oedd yn cael eu paratoi - 20% mewn gwirionedd - oedd yn cael eu defnyddio ac oedd yn wir angenrheidiol i'w harchwilio gan y tîm.
Roedd gorbrosesu samplau meinwe wedi creu ôl-groniad o waith, gan ofyn am adnoddau ychwanegol ac allanol. Ar ôl nodi, trwy ddata sy'n seiliedig ar dystiolaeth, nad oedd angen 80% o'r samplau, tynnodd y tîm y gwastraff diangen hwn o'u gweithdrefn brosesu. O fewn cyfnod byr, llwyddodd y prosiect gwella, gyda chefnogaeth newidiadau eraill, i leihau'r ôl-groniad yn sylweddol a chynyddu cyfradd prosesu'r samplau 50%. Rhoddodd hyn hefyd hwb oedd mawr ei angen i forâl staff.
Dywedodd Jonathan Clarke, Cyfarwyddwr Meddygol Cynorthwyol Gwella Ansawdd ym Mwrdd Iechyd Prifysgol Aneurin Bevan ac Arweinydd Clinigol ar gyfer Gwelliant Cymru: "Mae effeithiau rhyfeddol y gwelliant hwn gan y tîm Patholeg Gellol eisoes yn cael eu teimlo ar draws y gwasanaeth. Rwyf wedi cael llawer o gydweithwyr ymgynghorol, sy'n gweithio o fewn gwasanaethau canser, yn rhoi sylwadau ar faint yn gyflymach mae'r canlyniadau patholeg yn cael eu prosesu gan arwain at lai o oedi i gleifion."
Dywedodd Jeff Turner, Arweinydd Clinigol Llwybr Lle Mae Amheuaeth o Ganser ar gyfer Rhwydwaith Canser GIG Cymru: "Mae'r prosiect gwych yma’n dangos y cyfleoedd sylweddol sy'n bodoli i wella gwasanaethau i'n cleifion trwy ganolbwyntio ar effeithlonrwydd gyda sut rydym yn gweithio. Mae'n gyffrous gweld yr effaith uniongyrchol y mae hyn yn ei chael o fewn BIPAB ac ystyried y manteision cadarnhaol i'r gwasanaeth ehangach wrth symud ymlaen."
