Rheoli Presenoldeb
Pam bod rheoli presenoldeb yn bwysig i gyflogeion?
Mae gwaith yn hanfodol i iechyd, lles a hunan-barch. Pan fydd afiechyd yn achosi absenoldeb hirdymor oherwydd salwch, mae cylch seithug o iselder, ynysu cymdeithasol ac oedi cyn gwella yn ei gwneud yn llai tebygol y bydd cyflogai yn dychwelyd i'r gwaith.
Pam bod rheoli presenoldeb yn bwysig i gyflogwyr?
Mae mynd ati i leihau absenoldeb hirdymor oherwydd salwch yn helpu i gynnal busnes a gweithlu iach a chynhyrchiol yn ogystal â diogelu swyddi.
Camau i'w Hystyried ar gyfer Rheoli Absenoldeb:
- Cofnodwch absenoldeb er mwyn helpu i nodi patrymau absenoldeb a chynllunio brys
- Lluniwch bolisi clir sy'n gymwys i bob lefel o staff a sicrhau bod eich polisi'n deg.
- Cadwch mewn cysylltiad â staff yn ystod absenoldeb er mwyn osgoi sefyllfa lle mae cyflogeion yn teimlo'n ynysig ac wedi'u tanbrisio. Dilynwch y canllawiau ynglŷn â chadw mewn cysylltiad er mwyn osgoi peri'r teimlad bod pwysau i ddychwelyd i'r gwaith.
- Cynlluniwch a gwnewch addasiadau i'r gweithle er mwyn i staff ddychwelyd i'w swyddi presennol, neu ddyletswyddau amgen, a mynd ati i ddileu unrhyw rwystrau i ddychwelyd i'r gwaith.
- Defnyddiwch gyngor proffesiynol er mwyn helpu i gefnogi'r broses o ddychwelyd i'r gwaith. Gweler yr adran ar wasanaethau ategol isod am ragor o wybodaeth.
- Cytunwch ar gynllun dychwelyd i'r gwaith a'i adolygu sy'n amserol i'r cyflogai, ac yn nodi amcanion clir, pwyntiau adolygu, a gwybodaeth am unrhyw drefniadau gwaith amgen.
- Penodwch un enw cyswllt i gydgysylltu'r broses o ddychwelyd i'r gwaith er mwyn sefydlu prosesau cyfathrebu clir.
Effeithiau Absenoldeb ar eich Sefydliad
Gall absenoldeb oherwydd salwch gael effaith sylweddol ar berfformiad a chynhyrchiant sefydliad. Ceir rhai ffeithiau allweddol isod ynglŷn ag effeithiau absenoldeb oherwydd salwch:
- Collwyd 131 miliwn o ddiwrnodau gwaith yn economi'r DU oherwydd salwch yn 2013.
- Gall rheoli absenoldeb yn dda leihau faint o amser y bydd cyflogeion yn absennol o'r gwaith - mae cyfnod o absenoldeb yn para tua 17 diwrnod ar gyfartaledd.
- Gall lleihau'ch cyfraddau absenoldeb arbed arian i chi – amcangyfrifir y gall cyfanswm y costau sy'n gysylltiedig â throsiant staff gyrraedd £8,000 fesul cyflogai.
- Gall rheoli absenoldeb yn rhagweithiol helpu cyflogwyr i ymdrin â'r sefyllfa sy'n gwaethygu oherwydd disgwylir y bydd cyflogwyr yn ysgwyddo'r rhan fwyaf o'r baich economaidd sy'n gysylltiedig â gweithluoedd sy'n heneiddio, cyfraddau cynyddol o salwch cronig, a phwysau ar system y GIG
Cyfeiriadau
SYG – sickness absence in labour market, 2014, HSE, 2005, Mowbray D. (2008), Vaughan-Jones H. a Barham L. (2009). Healthy Work: Challenges and Opportunities to 2030. Bupa: Llundain, Black C. (2008), Working For a Healthier Tomorrow. Llyfrfa Ei Mawrhydi: Norwich
Podlediiad Rheoli Absenoldeb
05/08/2021
Gall absenoldeb oherwydd salwch effeithio'n sylweddol ar berfformiad a chynhyrchiant sefydliad ac mae ystadegau’n dangos bod mwy na 140 miliwn o ddiwrnodau gwaith yn y DU yn cael eu colli oherwydd salwch neu anaf. Mae Rhian Richards o Iechyd Cyhoeddus Cymru yn siarad â Geraint Hardy am yr hyn y mae angen i gyflogwyr ei wneud i reoli absenoldeb salwch orau, gan gynnwys defnyddio'r nodyn iach i weithio.
Dolenni defnyddiol:
Iechyd Cyhoeddus Cymru: https://icc.gig.cymru/
Arweiniad a Gwybodaeth Bellach
- Lawrlwythwch ganllaw syml i reoli absenoldeb oherwydd salwch mewn busnesau bach o wefan HSE.
- Dogfen ganllaw ar weithredu system rheoli absenoldeb ar wefan ACAS.
- Canllawiau ar y Nodyn Ffitrwydd i gleifion a chyflogeion, a chyflogwyr a rheolwyr llinell ar wefan GOV.UK.
- Canllawiau manwl i gyflogwyr a rheolwyr ar reoli absenoldeb oherwydd salwch a dychwelyd i'r gwaith.
- Mae Gwasanaeth Ffit i Weithio'r Adran Gwaith a Phensiynau yn rhoi cyngor a chymorth ynglŷn ag iechyd galwedigaethol i unigolion a chyflogwyr.
- Mynnwch y wybodaeth ddiweddaraf am newidiadau ym maes iechyd, diogelwch a lles drwy gofrestru i gael cylchlythyr Cymru Iach ar Waith.
- Ewch i wefan HSE am ragor o wybodaeth am reoli presenoldeb.