Mae Is-adran Sgrinio Iechyd Cyhoeddus Cymru yn cynnig hyfforddiant am ddim ar raglenni Sgrinio GIG Cymru.
Ar gyfer pwy mae'r hyfforddiant?
Mae'r hyfforddiant hwn ar gyfer pobl allweddol sy'n gweithio ac/neu sydd â rôl weithredol yn hybu iechyd a llesiant ar lefel gymunedol neu yn y gweithle.
Bydd yr hyfforddiant hwn yn rhoi'r sgiliau a'r wybodaeth i chi wneud y canlynol:
- Codi ymwybyddiaeth o sgrinio yn eich cymuned a/neu'ch gweithle
- Rhoi cymorth i’ch cyfoedion yn eich rhwydweithiau cymunedol
- Cyfleu gwybodaeth sgrinio mewn ffordd sy'n gweithio i'ch cymuned
- Cael sgyrsiau agored am sgrinio gyda'r bobl rydych chi'n eu cefnogi
- Cefnogi a chyfeirio pobl at adnoddau mewn fformatau hygyrch
- Cymryd rhan mewn cyfleoedd ymgysylltu i wella gwasanaethau sgrinio.
Beth fydda i'n ei ddysgu o'r hyfforddiant?
Mae tri modiwl ar gael sy'n cael eu cyflwyno trwy Microsoft Teams (MST). Cyflwynir y modiwlau yn Gymraeg ac yn Saesneg. Rydym yn argymell eich bod yn cwblhau’r modiwl ‘Cyflwyniad i Sgrinio’ yn gyntaf.
Modiwl Un - Cyflwyniad i Sgrinio (1 awr)
Bydd y modiwl hwn yn eich helpu i ddeall y canlynol:
- Sgrinio GIG Cymru
- Pam mae pobl yn cymryd rhan mewn rhaglenni sgrinio neu ddim yn cymryd rhan ynddynt pan gânt eu gwahodd.
- Sut y gallwn oresgyn rhwystrau i sgrinio.
- Yr adnoddau sydd ar gael.
Modiwl Dau - Rhaglenni Sgrinio (1 awr)
Bydd y modiwl hwn yn canolbwyntio ar Sgrinio Ymlediadau Aortig Abdomenol a Sgrinio Llygaid Diabetig.
Modiwl Tri - Rhaglenni Sgrinio Canser (1 awr)
Bydd y modiwl hwn yn canolbwyntio ar Sgrinio Serfigol, Sgrinio’r Fron a Sgrinio’r Coluddyn.
Bydd modiwlau dau a thri yn ymdrin â’r canlynol:
- Pwy sy'n gymwys i gael ei sgrinio.
- Pa brofion sy'n cael eu cynnig.
- Beth fydd yn digwydd pan fyddwch chi'n cymryd rhan.
- Pa adnoddau sydd ar gael.
- Beth allwch chi ei wneud i godi ymwybyddiaeth yn eich cymuned.
Os hoffech archebu lle neu am ragor o wybodaeth gallwch gysylltu â ni drwy anfon e-bost at: ymgysylltu.sgrinio@wales.nhs.uk