Meithrinfa Fun Foundations, Y Bont-faen

Amdanom ni

Sefydlwyd Fun Foundations yn 2010 ac ers hynny mae wedi agor ail leoliad yn Llanilltud Fawr. Rydym yn cyflogi 19 o staff ar ein safle yn y Bont-faen sy'n gofalu am nifer o blant o chwe wythnos oed. Rydym yn ymfalchïo yn y ffaith ein bod wedi ennill nifer o wobrau yn ymwneud â’n gweithwyr a phlant yn ein gofal.

Beth rydyn ni’n ei wneud

Pan fydd staff yn dychwelyd o absenoldeb mamolaeth, rydym yn eu croesawu'n ôl gan drafod/gofyn am unrhyw geisiadau sy'n ymwneud â bwydo ar y fron. Efallai ein bod eisoes yn ymwybodol bod aelod o staff yn bwydo ar y fron os ydynt yn dewis cael diwrnodau cadw mewn cysylltiad. Byddwn yn cynnal asesiad risg ar gyfer yr aelod o staff ac yn amlinellu unrhyw geisiadau a sut y byddwn yn gweithio i'w cyflawni. Yna bydd yr asesiad risg yn cael ei adolygu mewn gwerthusiadau un-i-un ac arfarniadau staff.

Mae gennym ystafell staff benodol ac ardal gyda seddau cyfforddus lle bydd staff yn gallu tynnu llaeth pan fo angen. Gallant storio unrhyw laeth yn ein hoergell a bydd yr aelod o staff yn mynd ag ef adref ar ddiwedd y dydd.

Rydym wedi cael achosion pan fo staff wedi dewis dod â'u plant i dderbyn gofal yn ein lleoliad pan fyddant yn dychwelyd i'r gwaith. Pe bai’r staff hynny’n dal i fwydo ar y fron, ac yn dewis bwydo ar y fron yn ystod y dydd, byddem yn cefnogi hyn ac yn deall pwysigrwydd bod staff yn teimlo eu bod yn cael eu gwerthfawrogi wrth ddychwelyd o absenoldeb mamolaeth.

Rydym eisiau sicrhau ein bod yn cwrdd ag anghenion pob plentyn yn ein gofal a thrwy wneud hyn rydym yn sicrhau eu bod yn gallu cael y maethynnau sydd eu hangen arnynt. Mae hyn yn dangos ein bod yn sicrhau eu gofal a'u llesiant. Yn ei dro, mae hyn hefyd yn rhoi teimlad o gysur i famau sy'n dychwelyd o absenoldeb mamolaeth, gan wybod y gall eu plant barhau â'u taith bwydo ar y fron. Rydym yn codi ymwybyddiaeth ar gyfer nifer o ymgyrchoedd iechyd sydd wedi'u hanelu at weithwyr a phlant yn ein gofal yn flynyddol. Rydym yn falch o fod wedi cefnogi Wythnos Ymwybyddiaeth Bwydo ar y Fron a byddwn yn parhau i wneud hynny.