Bwrdd Iechyd Prifysgol Betsi Cadwaladr - Datblygu ap digidol monitro methiant y galon o bell i rymuso cleifion i gyd-gynhyrchu eu gofal

Mae methiant y galon yn parhau i fod yn un o brif achosion afiachedd a marwolaethau yn y DU a ledled y byd. Mae gan gleifion â methiant y galon gyfradd marwolaeth o 30% ar ôl blwyddyn a 60% ar ôl 5 mlynedd, tra bod 70% o gostau methiant y galon i'r GIG yn deillio o fynd i'r ysbyty. Mae angen ffyrdd arloesol o weithio i sicrhau bod cleifion methiant y galon yn cael eu rheoli mewn modd amserol sy'n seiliedig ar dystiolaeth - sydd wedi arwain at ddatblygu system fonitro o bell ar gyfer methiant y galon.

Cychwynnwyd prosiect ym Mwrdd Iechyd Prifysgol Betsi Cadwaladr i dreialu datblygiad a defnydd technoleg monitro cleifion o bell (RPM) i reoli cleifion methiant y galon yn rhagweithiol yn eu cartrefi eu hunain. Mae'r Ap Cleifion yn casglu data iechyd, megis symptomau, cyfradd curiad y galon, pwysedd gwaed, dirlawnder ocsigen a phwysau. Yna gall clinigwyr adolygu’r data iechyd hwn drwy’r Porth i’w helpu i wneud penderfyniadau a nodi arwyddion cynnar o ddirywiad iechyd a gweithredu arnynt mewn modd amserol.

Cafwyd nifer o fanteision hynod gadarnhaol yn ystod y cynllun peilot, a ategwyd trwy gyfweliadau â'r arweinwyr clinigol priodol a chofnodion digwyddiadau galw cynyddol. Cofnodwyd 12 digwyddiad o ofal cynyddol - roedd 11 o'r rhain mewn achosion lle nad oedd y claf wedi ceisio cysylltu â gwasanaethau gofal iechyd ac felly dim ond o ganlyniad i'r Ap y cafodd gofal ei uwchgyfeirio. Ar draws y cynllun peilot cyfan o 40 o gleifion, llwyddwyd i osgoi 10 derbyniad oherwydd ymyrraeth gynnar drwy’r Ap. Roedd y cynnydd mewn hyder clinigol a ddarparwyd gan y llwyfan monitro yn galluogi timau acíwt i ryddhau cleifion yn gyflym.

Cafwyd adborth hynod gadarnhaol gan gleifion a chytunodd 100% o gleifion fod y feddalwedd yn ddefnyddiol o ran gwella cyfathrebu â chlinigwyr yn ogystal â rheoli eu cyflwr cardiaidd. Mae model ariannu busnes tymor hwy bellach yn cael ei greu, yn dilyn y peilot llwyddiannus.

Viki Jenkins

viki.jenkins@wales.nhs.uk