Oedolion hŷn

Gofynnwyd i bob un ohonom aros gartref er mwyn helpu i atal lledaeniad y coronafeirws, gyda chanllawiau penodol i oedolion hŷn neu'r rhai sydd mewn mwy o berygl.

Gall creu arferion newydd ac addasu i'r newidiadau hyn deimlo'n anodd. Mae teimlo'n bryderus neu'n rhwystredig yn normal, felly mae'n bwysig cymryd camau i ofalu am eich llesiant meddyliol.

Defnyddiwch y dull canlynol er mwyn helpu i dawelu eich meddwl a gofalu am eich teimladau, eich corff, eich meddyliau a'r hyn rydych yn ei wneud bob dydd:

• Gweithgareddau i dawelu'ch meddwl - i'ch helpu i deimlo'n well
• Rhoi sylw i anghenion sylfaenol – i helpu eich corff 
• Dysgu i ailfeddwl - i helpu eich meddyliau 
• Gwneud i'ch hun deimlo'n dda - i helpu'r hyn rydych yn ei wneud o ddydd i ddydd  

Edrychwch ar ein tudalen ‘Sut i ofalu am eich llesiant’ i gael syniadau cyffredinol ar sut i beidio â chynhyrfu.

Cadw'n iach ar gyfer y genhedlaeth hŷn 

Yn ystod y cyfnod heriol hwn byddwn yn treulio llawer mwy o amser gartref ac ar wahân i'n teulu a'n ffrindiau. Bydd hyn yn golygu rhai newidiadau mawr i'n gweithgareddau a'n harferion arferol.  O ganlyniad, mae gofalu am ein hiechyd meddwl a chorfforol yn mynd i fod yn bwysicach nag erioed. Mae gennym rai awgrymiadau a dolenni defnyddiol isod i helpu gyda hynny.

• Siarad â theulu neu ffrindiau a all dawelu eich meddwl. Meddyliwch am bwy sy'n gwneud i chi deimlo'n well a gwnewch bwynt o gysylltu â nhw. Os ydych dros 70 oed a heb rywun i siarad â nhw, gallwch ddefnyddio Gwasanaeth Sgwrs dros y Ffôn Age Cymru.
• Mae llawer o ymarferion ymlacio ac ymwybyddiaeth ofalgar gwahanol a all eich helpu i ofalu am eich llesiant. Mae gan Age UK wybodaeth am ymwybyddiaeth ofalgar ar eu gwefan.

• Ceisio cael rhywfaint o ymarfer corff bob dydd, waeth pa mor fach. Mae gan y GIG rai ymarferion eistedd syml os oes angen i chi wella eich symudedd.

• Meddwl am amseroedd cadarnhaol, mae ymchwil yn dweud bod hyn yn dda i ni: mae mynd drwy hen ffotograffau a siarad am eich atgofion ag eraill yn gallu helpu.

• Cysylltu â rhywun sy'n gwneud i chi wenu, gall fod yn ffrind, cymydog, wŷr neu wyres. Ceir gwahanol ffyrdd o gysylltu â phobl ac mae gan y BBC ganllaw cam wrth gam ar sut i wneud galwad fideo.