ENILLYDD - Bwrdd Iechyd Prifysgol Betsi Cadwaladr - Cerbyd diagnostig cardioleg gymunedol. Ymateb arloesol i C19 a'r dyfodol ar gyfer diagnostig cardiaidd

Yn ystod cyfnod clo cyntaf pandemig COVID-19, nid oedd gwasanaeth diagnostig methiant y galon gymunedol sy’n cael ei redeg gan Fwrdd Iechyd Prifysgol Betsi Cadwaladr yn gallu parhau yn ei fformat presennol. Caeodd yr ysbytai cymunedol eu drysau er mwyn darparu gwelyau ar gyfer cleifion COVID-positif, gan effeithio ar y dewis rhwng gohirio’r clinigau a gwylio rhestrau aros yn tyfu, neu addasu’r gwasanaeth a ddarperir i barhau i gefnogi grŵp cleifion agored i niwed.

I ddechrau, penderfynwyd bod angen i gleifion gael eu hasesu’n glinigol yn niogelwch eu cartrefi eu hunain. O ganlyniad, addasodd y clinigau eco-ddiagnostig cymunedol eu gwasanaeth i ddarparu ymweliadau cartref rhwng Ebrill 2020 a Medi 2020, a chynhaliwyd ymweliadau â chyfarpar clinigol presennol, gan gynnwys peiriant Echo cludadwy, i asesu, gwneud diagnosis a rheoli cleifion yr amheuir bod ganddynt fethiant y galon.  Roedd yr ymweliadau cartref hyn, er eu bod yn gwbl angenrheidiol, yn ergonomegol anodd iawn i'w cynnal. Roedd angen ateb cynaliadwy hirdymor a oedd yn darparu amgylchedd diogel a rheoledig y gellid mynd ag ef at y claf, gan arwain at y syniad o gerbyd diagnostig cardioleg.

Roedd y cerbyd yn galluogi'r tîm i ehangu clinigau yn ddeinamig, yn dibynnu ar hyd yr amser aros. Roedd yn caniatáu clinigau dwbl (un yn yr ystafell glinig, a’r llall ym maes parcio’r ysbyty cymunedol) a hefyd yn darparu’r gallu i gynnal ymweliadau cartref â chleifion nad ydynt yn gallu cael mynediad at gludiant ond sy’n wynebu risg uchel o gael eu derbyn, gan sicrhau bod y cleifion yn cael diagnosis prydlon a thriniaeth ddilynol o fethiant y galon, gan helpu i osgoi cael eu derbyn i'r ysbyty.

Dangosodd adolygiad o’r cleifion yr ymwelwyd â nhw yn ystod y cyfnod clo 5 mis a’r ymyriadau yr oedd eu hangen ar frys oherwydd dirywiad tebygol rhai o’r cleifion hyn, fod o leiaf 10 o dderbyniadau i’r ysbyty ar gyfer dad-ddigolledu methiant y galon wedi’u hosgoi (13% o'r holl gleifion yr ymwelwyd â hwy).

Liliana Shirley

liana.shirley@wales.nhs.uk