Dangosodd yr astudiaeth hon ei bod yn bosibl cysylltu data awdurdodau lleol (ALl) â chofnodion iechyd electronig (EHR) a gesglir fel mater o drefn o fewn Banc Data SAIL. Mae’r dull hwn yn helpu i ddeall yn well y bobl sy’n defnyddio gofal ailalluogi yng Nghymru. Mae hefyd yn dangos sut y gall cyfuno gwybodaeth gofal iechyd a llywodraeth leol roi darlun cliriach o boblogaeth, yn debyg i ymchwil yn y gorffennol ar ofalwyr di-dâl yng Nghymru.
Roedd y bobl a oedd yn cael gofal ailalluogi yn fenywod yn bennaf, o grwpiau oedran hŷn, ac mewn iechyd gwaeth na'r rhai nad oeddent yn defnyddio'r gwasanaethau hyn.
Gostyngodd nifer y pecynnau gofal ailalluogi a gyrchwyd dros gyfnod yr astudiaeth, ond arhosodd oedran, rhyw ac iechyd y rhai sy'n cael mynediad at y gofal yn sefydlog.
Roedd gwasanaethau ailalluogi a’r timau sy’n eu darparu yn amrywio ar draws awdurdodau lleol. Gall y gwahaniaethau hyn adlewyrchu anghenion lleol, adnoddau, neu sut mae gwasanaethau wedi esblygu.
Roedd atgyfeiriadau ar gyfer pecynnau gofal ailalluogi yn fwy cyffredin o ffynonellau cymunedol nag o ysbytai ar draws pob oedran. Fodd bynnag, wrth i oedran gynyddu, gostyngodd cyfran yr atgyfeiriadau cymunedol tra cynyddodd atgyfeiriadau ysbyty. Gall hyn fod oherwydd bod cleifion hŷn yn fwy tebygol o fod angen gofal ysbyty.
Roedd y rhan fwyaf o becynnau gofal ailalluogi yn atal yr angen am gynllun gofal a chymorth hirdymor.
Cafeatau/cyfyngiadau
Mae'r astudiaeth hon yn dadansoddi pobl sy'n defnyddio gofal ailalluogi ym Mhen-y-bont ar Ogwr a RhCT. Ni ddylid defnyddio'r canfyddiadau i werthuso perfformiad gwasanaethau lleol ond yn hytrach i gynnig mewnwelediad ar gyfer gwella'r modd y darperir gwasanaethau.
Er bod rhai tebygrwydd i Ben-y-bont ar Ogwr a RhCT, ni ellir ystyried bod y canfyddiadau hyn yn gynrychioliadol o ofal ailalluogi ledled Cymru oherwydd gwahaniaethau mewn demograffeg, gwasanaethau, systemau data, ac arferion cofnodi ar draws gwahanol feysydd.
Dim ond pecynnau gofal ailalluogi a ddarparwyd yn ystod cyfnod yr astudiaeth y mae’r dadansoddiad yn eu cynnwys, felly ni ellir dod i unrhyw gasgliadau am y galw cyffredinol am y gwasanaethau hyn na’r angen ehangach am ofal ailalluogi. Er nad oedd angen cymorth hirdymor ar y rhan fwyaf o becynnau gofal, mae’n bosibl bod unigolion wedi dilyn gofal preifat yn annibynnol o hyd.
O ystyried natur ddisgrifiadol yr astudiaeth hon, mae'n amhosibl dod i gasgliadau ehangach am effaith gofal ailalluogi yn yr awdurdodau lleol hyn.
Nid oedd yr astudiaeth yn cynnwys gwybodaeth fanwl am y gofal a gyrchwyd, gan ei gwneud yn amhosibl cymharu'r ymyriadau neu'r cymorth a ddarparwyd dros amser neu ar draws gwahanol grwpiau yn gywir.
Casgliad/goblygiadau
Cipolwg Newydd ar Ofal Ailalluogi: Mae'r astudiaeth hon yn rhoi mewnwelediad newydd i ddemograffeg ac iechyd pobl sy'n defnyddio gofal ailalluogi mewn ardaloedd penodol o Gymru. Mae’n ychwanegu gwerth drwy ein helpu i ddeall y boblogaeth yn well, nodi anghydraddoldebau posibl, a dod o hyd i ffyrdd o wella’r modd y darperir gwasanaethau.
Effaith Gadarnhaol Ailalluogi: Yn debyg i ddata gan StatsCymru, mae ein canfyddiadau’n awgrymu bod gofal ailalluogi yn gyffredinol yn cael effaith gadarnhaol. Fodd bynnag, mae gwahaniaethau awdurdodau lleol mewn systemau data ac arferion cofnodi yn ei gwneud yn anodd deall yr effaith yn llawn.
Casglu Data Safonol: Gallai cyflwyno diffiniadau data cyffredin, safonau, ac arferion casglu ar draws awdurdodau lleol yng Nghymru roi mewnwelediad dyfnach i ganlyniadau iechyd. Byddai hyn yn helpu i dargedu’r rhai sydd â’r angen mwyaf, yn eu cefnogi i ennill a chynnal annibyniaeth, ac yn galluogi gwerthuso modelau gofal newydd—hybu arloesedd ym maes iechyd a gofal cymdeithasol.