Yn ystod y 1000 diwrnod cyntaf mae rhieni yn ganolog i fywydau plant; maent yn llunio profiadau plant a'u rhyngweithio â'r byd. Mae magu plant hyderus, cydnerth a chadarnhaol yn gysylltiedig â gwell iechyd, llesiant a dysgu i blant yn awr ac i'w dyfodol. Mae gan gamau gweithredu i gefnogi rhieni i ffynnu yn eu rôl magu plant y potensial i dorri cylchoedd o anfantais rhwng y cenedlaethau a chefnogi llesiant cenedlaethau'r dyfodol.
Nid yw magu plant yn hawdd. Mae'n anoddach os nad oes gennych y pethau sydd eu hangen arnoch ac rydych yn poeni'n gyson am gael dau ben llinyn ynghyd. Mae'r rhain yn wahaniaethau annheg o ran yr adnoddau a'r cymorth sydd gan rieni a'r amgylchiadau sy'n eu hwynebu. Mae gwybodaeth a sgiliau magu plant yn chwarae rhan ond, i gefnogi rhieni i roi'r dechrau gorau mewn bywyd i'w plentyn, mae angen gweithredu ar draws y system.
Mae'r lleoedd y mae rhieni yn byw, yn gweithio ac yn cymdeithasu ynddynt yn dylanwadu ar fagu plant mewn dwy ffordd. Maent yn dylanwadu ar sut y mae rhieni yn meddwl ac yn teimlo, a’r hyn y gallant ei wneud. Mae cymdeithas sy'n cefnogi magu plant yn cynnig gwaith teg; cartrefi sy'n ddiogel ac yn gynnes; trafnidiaeth fforddiadwy; cymunedau cryf; a mynediad hawdd at wasanaethau cefnogol pan fydd eu hangen.
Bydd pob teulu yn wynebu cyfnodau anodd ac ni fydd bob amser yn bosibl mynd i'r afael â'r achos sylfaenol ar unwaith. Mae teuluoedd yn aml yn teimlo effaith argyfyngau economaidd ac amgylcheddol sydd y tu hwnt i reolaeth un sefydliad. Mae camau gweithredu i wella llesiant meddyliol a rhwydweithiau cymorth rhieni yn darparu llwybr i leihau effaith ffactorau strwythurol ehangach ar iechyd, llesiant a dysgu plant. Mae ymyriadau sy'n ystyried teimladau rhieni, yr adnoddau sydd eu hangen arnynt, a'u rhwydweithiau cymdeithasol yn fwy tebygol o gefnogi magu plant yn effeithiol.