Adroddiadau blynyddol gwyliadwriaeth ffliw a brechu rhag y ffliw
Mae Iechyd Cyhoeddus Cymru yn monitro canran y rhai sy'n manteisio ar imiwneiddio rhag ffliw tymhorol bob blwyddyn.
Yn ystod pob rhaglen imiwneiddio rhag y ffliw (rhwng mis Hydref a mis Mawrth fel arfer), rhoddir crynodeb o ganran y rhai sy'n cael eu himiwneiddio bob wythnos yn yr adroddiad wythnosol ar weithgarwch ffliw yng Nghymru. Cyflwynir y ffigurau terfynol bob blwyddyn ar ddiwedd y tymor ffliw mewn adroddiad blynyddol, sydd hefyd yn cynnwys crynodeb epidemiolegol o'r tymor.
Yr adroddiad mwyaf diweddar
Tymor y ffliw 2023-24 yng Nghymru
Prif bwyntiau'r adroddiad 2023/24
- Yn 2023/24 gwelwyd lefel isel o ffliw o’i gymharu â’r tymor blaenorol. Roedd cyfradd ymgynghori sentinel y meddygon teulu ar gyfer salwch tebyg i'r ffliw (ILI) yn uwch na'r lefelau sylfaenol am bythefnos yn unig, oedd llawer byrrach na'r cyfartaledd (13.5 wythnos) ac ni chyrhaeddodd lefelau gweithgarwch canolig.
- Yn gyffredinol, ffliw A(H1N1)pdm09 oedd y feirws ffliw amlycaf.
- Roedd y nifer a gafodd y brechlyn ffliw yn 72.5% ymhlith y rhai 65 oed a hŷn, o’i gymharu â 76.3% y tymor diwethaf.
- Roedd y nifer a gafodd y brechlyn ffliw yn 39.1% ymhlith cleifion o dan 65 oed mewn un neu fwy o grwpiau risg clinigol, sy’n ostyngiad o’i gymharu â 44.2% yn 2022/23. Roedd y nifer a gafodd y brechlyn ffliw ymhlith grwpiau risg clinigol ar eu huchaf ymhlith cleifion â diabetes (51.4%) ac isaf ymhlith y rhai a oedd yn afiachus o ordew (34.6%).
- Roedd y nifer a gafodd y brechlyn ffliw ymhlith menywod beichiog yn 60.9% (mesurwyd mewn arolwg blynyddol o fenywod mewn unedau mamolaeth mawr ym mis Ionawr 2024).
- Roedd y nifer a gafodd y brechlyn ffliw ymhlith plant dwy a thair oed, a gafodd eu himiwneiddio’n bennaf mewn practisiau cyffredinol, yn 42.8%. Y nifer o blant a gafodd eu himiwneiddio mewn ysgolion: rhwng pedair a 10 oed 61.9%, a rhwng 11 a 15 oed 49.7%.
- Roedd y nifer a gafodd eu himiwneiddio rhag y ffliw ymhlith staff Byrddau Iechyd a GIG, a adroddwyd gan Adrannau Iechyd Galwedigaethol y Byrddau Iechyd, yn 40.8% yn ystod 2023/24. Roedd 40.5% o staff â chyswllt uniongyrchol â chleifion wedi'u eu brechu rhag y ffliw.
- Cafodd cyfanswm o 107,875 o bobl eu himiwneiddio rhag y ffliw mewn fferyllfeydd cymunedol yn ystod 2023/24.
- Cyfanswm yr unigolion yng Nghymru a gafodd eu himiwneiddio rhag y ffliw oedd 922,842 ar gyfer 2023/24 (tua 29% o boblogaeth Cymru), o’i gymharu ag amcangyfrif o 1,063,495 y tymor diwethaf.
Ffeithlun cryno adroddiad 2023/24:
