Wythnos 66: Canlyniadau arolwg ymgysylltu â'r cyhoedd 'Sut ydym ni yng Nghymru?'
Cyhoeddwyd: 23 Gorffennaf 2021
Mae canlyniadau’r arolwg diweddaraf i ymgysylltu â'r cyhoedd, sef ‘Sut ydym ni yng Nghymru?’ wedi'u rhyddhau gan Iechyd Cyhoeddus Cymru.
Dyma'r canfyddiadau allweddol:
- roedd 50 y cant yn cytuno y dylai pobl sydd wedi cael y ddau frechiad allu cwrdd â'i gilydd heb gadw pellter cymdeithasol na gwisgo masgiau; i fyny o 42 y cant yn wythnos ddiwethaf yr arolwg. roedd 50 y cant yn anghytuno.
- roedd 81 y cant o bobl o'r farn bod y cyfyngiadau sydd ar waith i reoli coronafeirws yn ‘iawn fwy neu lai’; roedd 7 y cant o'r farn eu bod yn ‘rhy ychydig’ ac roedd 11 y cant o'r farn eu bod yn ‘ormod’.
- dywedodd 37 y cant o bobl eu bod yn dilyn cyfyngiadau coronafeirws ‘yn llwyr’, i lawr o 43 y cant yn wythnos ddiwethaf yr arolwg.
- dywedodd 9 y cant o bobl eu bod yn bryderus iawn am ddal coronafeirws ac roedd 25 y cant o bobl yn weddol bryderus; i fyny o 5 y cant a 23 y cant yn wythnos ddiwethaf yr arolwg.
Mae adroddiad diweddaraf yr arolwg ymgysylltu â'r cyhoedd ar y Coronafeirws Newydd (COVID-19) gan Iechyd Cyhoeddus Cymru yn cwmpasu'r cyfnod 5 i 14 Gorffennaf 2021, pan gafodd 653 o bobl eu holi
Bob pythefnos mae Iechyd Cyhoeddus Cymru yn cynnal cyfweliadau â channoedd o bobl 18 oed neu drosodd ledled Cymru, i ddeall sut y mae'r Coronafeirws Newydd (COVID-19) a’r mesurau sy'n cael eu defnyddio i atal ei ledaeniad yn effeithio ar lesiant corfforol, meddyliol a chymdeithasol pobl yng Nghymru.
Mae'r arolwg yn rhan o gyfres o fesurau a weithredir gan Iechyd Cyhoeddus Cymru i gefnogi iechyd a llesiant y cyhoedd drwy gyfnod y Coronafeirws.
