Ein nod yw dylanwadu ar bolisi a’i lywio ar lefel genedlaethol a lleol, gan weithio’n agos gyda chydweithwyr ar draws Iechyd Cyhoeddus Cymru a rhanddeiliaid eraill i wella iechyd a lleihau anghydraddoldebau.

Mae’r Is-adran yn cynnwys y timau canlynol:

• Tîm Polisi a Phartneriaethau:  Mae’r Tîm Polisi yn cydlynu cyfranogiad Iechyd Cyhoeddus Cymru mewn ymgynghoriadau a’r gwaith o’u monitro, datblygiad polisi a deddfwriaeth sy’n effeithio ar iechyd y boblogaeth. Ffocws allweddol i’n gwaith yw helpu i ddatblygu ymagwedd amlsector, er enghraifft trwy’r Tîm Ymyrraeth Gynnar ac Ataliaeth (wedi ei ariannu gan Heddlu De Cymru) sydd yn cyflenwi rhaglen waith ar y cyd gyda’r sector cyfiawnder troseddol, yn cynnwys Comisiynydd Heddlu a Throseddu De Cymru.  Rydym hefyd yn cyflwyno cynllun gwaith ar y cyd ar iechyd a thai gyda Thai Cymunedol Cymru.
• Rhwydwaith Iechyd Cyhoeddus Cymru: Mae’r Rhwydwaith yn cefnogi pawb sydd yn gweithio ym maes iechyd y cyhoedd, waeth pa sector neu ddisgyblaeth, i hybu a llywio arfer gorau mewn polisi gwella iechyd, ymarfer ac ymchwil.
• Uned Gymorth Asesu Effaith ar Iechyd Cymru: Rôl yr Uned yw cefnogi datblygiad a defnydd effeithiol o ymagwedd asesu effaith ar iechyd (HIA) yng Nghymru trwy gydweithredu a darparu hyfforddiant, arweiniad, gwybodaeth a chyngor ar bob agwedd ar ymarfer HIA.
• Hyb Iechyd a Chynaliadwyedd: Mae’r Hyb yn cynorthwyo Iechyd Cyhoeddus Cymru i fodloni ei ddyletswyddau yn unol â Deddf Llesiant Cenedlaethau’r Dyfodol (Cymru) 2015 ac mae hefyd yn gweithio gyda’n partneriaid i gynyddu’r cyfleoedd i wella iechyd a llesiant a lleihau anghydraddoldebau.

Arweinydd: Dr Sumina Azam