Enillwyr Gwobrau Curwch Ffliw 2021
Cyhoeddwyd: 05 May 2021
Mae enillwyr y Gwobrau Curwch Ffliw blynyddol yng Nghymru wedi cael eu cyhoeddi.
Mae'r gwobrau hyn yn cydnabod ac yn dathlu ymdrech anhygoel unigolion a thimau yng Nghymru sydd wedi gweithio'n galed i godi ymwybyddiaeth a hyrwyddo brechiad y ffliw yng Nghymru yn ystod y gaeaf heriol iawn yma.
Gwobr unigol sy'n agored i unrhyw un sy'n ymwneud ag unrhyw elfen o'r rhaglen ffliw yng Nghymru, sydd wedi dangos ymrwymiad ac ymroddiad i wella'r niferoedd sy'n cael brechiad y ffliw.
Enillydd: Linda Tadgell, Arbenigwr Nyrsio Clinigol, Meddygaeth Resbiradol, Bwrdd Iechyd Prifysgol Betsi Cadwaladr
Mae Ms Tadgell wedi dangos ymrwymiad mawr yn ei rôl fel brechwr cydweithwyr, gan ddyblu bron nifer y brechiadau ffliw mae wedi'u rhoi i staff o gymharu â'r flwyddyn flaenorol. Mae wedi helpu i greu diwylliant o ymgysylltu ynghylch ymgyrch y ffliw gan ddefnyddio ei gwybodaeth a'i phrofiad o frechu rhag y ffliw i gefnogi holl staff yr ysbyty. Gan dargedu meysydd blaenoriaeth uchel allweddol (a chefnogi cydweithwyr i wneud y penderfyniad cywir i amddiffyn eu hunain ac eraill drwy gael eu brechu) mae Ms Tadgell wedi chwarae rhan allweddol yn y gwaith o gyflwyno'r rhaglen ffliw.
Canmoliaeth Uchel: Emma Williams, Nyrs Practis, Meddygfa Gwalchmai, Bwrdd Iechyd Prifysgol Betsi Cadwaladr
Nyrs Practis sydd bob amser yn fodlon mynd yr ail filltir er budd ei chleifion.
Roedd y wobr hon yn agored i unrhyw dîm sy’n ymwneud â rhaglen y ffliw yng Nghymru.
Enillydd: Alison Jones, Gofal Sylfaenol Fferyllfa Gymunedol, Bwrdd Iechyd Prifysgol Cwm Taf Morgannwg a Rhianydd Davies, Iechyd Galwedigaethol, Cyngor Bwrdeistref Sirol Rhondda Cynon Taf
Roedd y tîm hwn yn cynnwys cydweithio rhwng y bwrdd iechyd a'r awdurdod lleol i annog staff gofal cymdeithasol i gael brechiad y ffliw. Rhoddodd fferyllfeydd cymunedol frechiadau mewn clinigau a sefydlwyd mewn swyddfeydd/adeiladau cyngor gwag. Mae'r cydweithio hwn wedi’i nodi fel llwyddiant mawr, gan y cyngor, y fferyllwyr cymunedol ac yn arbennig y staff a ddefnyddiodd y gwasanaeth.
Canmoliaeth Uchel: Tîm Brechu’r Gyfarwyddiaeth Iechyd Meddwl ac Anableddau Dysgu, Bwrdd Iechyd Prifysgol Hywel Dda
Cydweithiodd y tîm yma’n frwdfrydig, gan gynnig cyfuniad o ddulliau gweithredu oedd yn sicrhau bod y brechiad yn cael ei ddarparu mewn ffordd amserol, effeithiol a hygyrch i staff y bwrdd iechyd.
Gwobr sy'n agored i unrhyw un sy'n ymwneud â'r rhaglen ffliw yng Nghymru ac sydd wedi rhoi sylw i annhegwch, anghydraddoldeb neu gynhwysiant.
Enillydd: Cath Hughes, Nyrs Imiwneiddio, Bwrdd Iechyd Prifysgol Caerdydd a’r Fro
Drwy waith caled, dyfalbarhad a chyffyrddiad personol, mae Ms Hughes wedi meithrin perthynas o ymddiriedaeth gydag ysgol Fwslimaidd annibynnol nad yw wedi ymwneud yn flaenorol â'r rhaglen ffliw flynyddol ar gyfer disgyblion, gan helpu i roi sylw i bryderon, a hwyluso brechu rhag y ffliw i'r disgyblion. Gweledigaeth Ms Hughes yw meithrin perthynas, cydweithio, cynhwysiant a thegwch.
Roedd y wobr hon yn ystyried y niferoedd sydd wedi cael brechiad y ffliw mewn byrddau ac ymddiriedolaethau iechyd yn GIG Cymru. Panel arbenigol oedd y beirniaid, a ystyriodd y data ar gyfer gwella a chyflawni.
Enillydd: Bwrdd Iechyd Prifysgol Betsi Cadwaladr (BIPBC)
Mae BIPBC wedi sicrhau cynnydd o bron i 15 y cant yn nifer y staff rheng flaen sydd wedi cael brechiad y ffliw o gymharu â’r llynedd. Mae wedi dangos y cynnydd mwyaf ymhlith yr holl fyrddau/ymddiriedolaethau iechyd yng Nghymru, sy’n golygu bod 2,000 o staff rheng flaen ychwanegol wedi cael eu brechu eleni. Cyflawniad gwych mewn blwyddyn mor heriol.
Ystyriodd y panel arbenigol oedd yn barnu’r wobr hon y niferoedd sydd wedi cael brechiad y ffliw mewn meddygfeydd ledled Cymru, ar draws elfennau amrywiol y rhaglen.
Enillydd: Canolfan Feddygol Isca, Bwrdd Iechyd Prifysgol Aneurin Bevan
Cynyddodd y feddygfa hon y niferoedd sydd wedi cael brechiad y ffliw ar draws yr holl grwpiau cymwys, gyda’r cynnydd mwyaf yn y niferoedd sydd wedi cael brechiad y ffliw ymhlith y grŵp cyflyrau iechyd tymor hir yng Nghymru. Cynnydd o 32.5 y cant.
Gyda mwy na 70 y cant wedi cael y brechiad yn y grŵp hwn, a mwy nag 80 y cant ymhlith y rhai 65 oed a hŷn, a phlant dwy a thair oed, maent yn enillwyr teilwng y Wobr Cyflawniad Meddygfa.