Creu lleoedd a mannau iach: dull cydweithredol

Ynglŷn â'r digwyddiad hwn

Cynhaliwyd y digwyddiad yn dilyn cyhoeddi’r adroddiad – “Mwyafu cyfleoedd iechyd a lles mewn cynllunio gofodol wrth ailsefydlu yn sgîl y pandemig COVID-19” a nododd sut mae cydweithio rhwng cynllunio gofodol ac iechyd yn hanfodol er mwyn manteisio i’r eithaf ar y cyfleoedd iechyd a lles wrth adfer ar ôl pandemig COVID-19. Cyflwynodd y digwyddiad ganfyddiadau’r adroddiad hwn.

Amlygodd nifer o gyflwyniadau sut y gellir cydgysylltu cynllunio ac iechyd. Ymdriniodd siaradwyr â’r materion cyfredol sy’n wynebu ein cymunedau a’n lleoedd, pwysigrwydd cydweithio, dylunio ar gyfer plant a chreu lleoedd iach i bawb ac enghraifft o ymgysylltu rhwng cenedlaethau ar brosiect cynllunio a dylunio.

Amcanion y digwyddiad oedd:

• Deall yr heriau mawr sy’n wynebu cymunedau gan gynnwys effeithiau pandemig COVID-19
• Deall y cyfraniad y gall cynllunio a chreu lleoedd ei wneud i fynd i’r afael â’r heriau iechyd mawr sy’n wynebu cymunedau.
• Dangos technegau i gynllunwyr a gweithwyr iechyd proffesiynol ymgysylltu’n effeithiol â chymunedau lleol er mwyn gwneud y mwyaf o ganlyniadau dysgu gwaith creu lleoedd:
• Mwy o gydweithio rhwng gweithwyr iechyd proffesiynol a chynllunwyr
• Mwy o wybodaeth am sut y gall gweithio ar y cyd arwain at ddatblygu lleoedd a mannau iach
• Archwilio a chryfhau cyfleoedd a rolau wrth greu lleoedd newydd, gan ddefnyddio offer a chanllawiau i ddarparu’r manteision mwyaf posibl i gymunedau

Cadeiriwyd y digwyddiad gan Kate Eden, Is-gadeirydd, Iechyd Cyhoeddus Cymru. Dywedodd Kate ‘Roedd yn wych gweld cynifer o bobl yn bresennol, a oedd am ddysgu rhagor am y cyfleoedd a’r potensial ar gyfer gweithio cydgysylltiedig rhwng cynllunwyr a gweithwyr iechyd proffesiynol. Roedd y cynrychiolwyr yn gallu clywed rhai enghreifftiau o ble y gwneir hyn yn effeithiol, a hefyd yn cymryd rhan mewn trafodaethau am adnoddau a fydd yn eu cefnogi wrth iddynt fwrw ymlaen â’r gwaith hwn ledled Cymru’.