Effeithiau Newid Hinsawdd ar Iechyd yng Nghymru: Archwilio’r sylfaen dystiolaeth a nodi blaenoriaethau ar gyfer y dyfodol

Ynglŷn â'r digwyddiad hwn

Mae Asesiad o’r Effaith ar Iechyd diweddar Iechyd Cyhoeddus Cymru yn cydnabod mai newid hinsawdd yw’r bygythiad mwyaf i iechyd a llesiant y bydd Cymru’n ei wynebu yn y ganrif hon. Bydd deall, paratoi ar gyfer effeithiau newid hinsawdd ar iechyd ac addasu iddynt yn faes allweddol i’r system iechyd a phartneriaid dros y degawd nesaf.

Mae nifer o adroddiadau wedi rhannu mewnwelediadau a gwybodaeth am effeithiau newid hinsawdd ar iechyd ond a oes gennym yr holl dystiolaeth sydd ei hangen arnom i wneud newid go iawn? Ble mae’r bylchau o ran ein gwybodaeth a’n dealltwriaeth? Pa gwestiynau sydd angen i ni eu gofyn i sicrhau mai’r strategaethau a’r dulliau rydym yn eu defnyddio yw’r rhai mwyaf effeithiol?

Daeth y gweminar hon â thystiolaeth gyfredol ynghyd ar effeithiau newid hinsawdd ar iechyd ledled Cymru gan gynnwys adroddiadau diweddar gan Iechyd Cyhoeddus Cymru.  Mae newid hinsawdd yn mynd i gael effaith sylweddol ar iechyd a llesiant yng Nghymru – cafwyd cyfnodau o dywydd eithafol yn fwy aml yng Nghymru yn y blynyddoedd diwethaf ac maent wedi effeithio ar seilwaith, gwasanaethau a llesiant corfforol a meddyliol y boblogaeth.  Mae angen tystiolaeth gadarn arnom i helpu’r sector iechyd i addasu i’r newidiadau hyn.

Canlyniadau Dysgu:

Bydd y rhai a fydd yn bresennol yn dod i ddeall y canlynol:

• effeithiau iechyd a llesiant newid hinsawdd yng Nghymru a’r risgiau a’r cyfleoedd ar lefel Cymru a’r DU
• y dystiolaeth bresennol ynghylch effeithiau newid hinsawdd ar iechyd
• yr angen am ddadansoddiad o fylchau ar draws pob agwedd ar ein hymateb i newid hinsawdd er mwyn sicrhau newid parhaol ac effeithiol.

Cliciwch yma am yr agenda.

Mae trawsgrifiad o’r fideo ar gael ar gais.