Neidio i'r cynnwys

Newid iaith y wefan

Brechlynnau sy'n cynnwys y frech goch, clwy'r pennau, rwbela a brech yr ieir (MMRV ac MMR) - Gwybodaeth brechlynnau MMRV ac MMR ar gyfer weithwyr iechyd

Newidiadau i’r amserlen imiwneiddio rheolaidd i blant yng Nghymru yn 2026 

Yn dilyn llwyddiant rhaglenni brechu rhag varicella (brech yr ieir) mewn gwledydd eraill, argymhellodd y Cyd-bwyllgor ar Imiwneiddio a Brechu (JCVI) ychwanegu rhaglen frechu gyffredinol rhag brech yr ieir ac iddi ddwy ddos ​​​​gynhwysol at yr amserlen imiwneiddio rheolaidd i blant y DU.  

Dechreuodd rhaglen frechu reolaidd y GIG rhag farisela (brech yr ieir) ar gyfer babanod ar 1 Ionawr 2026. Y brechlyn a gaiff ei ddefnyddio yw’r brechlyn MMRV cyfun ar gyfer y frech goch, clwy’r pennau, rwbela a farisela.

Mae gwybodaeth fanwl am y newidiadau i argymhellion brechu ar gyfer babanod a phlant ifanc, gan gynnwys cymhwysedd, i’w gweld isod ar y dudalen hon.  

Neu cyfeiriwch at y canlynol: 

Polisi Llywodraeth Cymru – Llythyr at weithwyr proffesiynol yn egluro’r newidiadau arfaethedig i amserlenni brechlynnau ar gyfer babanod a phlant ifanc o 1 Ionawr 2026:    

Cefndir

Rhaglen dal i fyny ddetholus ar gyfer brechu rhag farisela (brech yr ieir) yn rhedeg o fis Tachwedd 2026 i fis Mawrth 2028

Mae varicella (brech yr ieir) yn glefyd heintus iawn a achosir gan y feirws varicella zoster sy’n digwydd amlaf mewn plant ifanc. Mae varicella fel arfer yn ymddangos gyda brech goslyd, bothellog, sy’n dilyn twymyn ac anhwylder. Mae’r rhan fwyaf o achosion mewn plant yn ysgafn ac yn hunangyfyngedig. Fodd bynnag, mae rhai plant yn datblygu cymhlethdodau, gan gynnwys haint bacteriol o friwiau croen (gan gynnwys streptococws grŵp A) ac mewn achosion prin, enseffalitis, niwmonitis a strôc. Gall y cymhlethdodau hyn arwain at arhosiad yn yr ysbyty ac yn anaml iawn, gallant arwain at farwolaeth. 

Mae GIG Cymru yn cynnig rhaglen dal i fyny am gyfnod cyfyngedig ar gyfer farisela (brech yr ieir) gan ddefnyddio’r brechlyn MMRV cyfun. Mae hyn er mwyn helpu i amddiffyn plant cymwys rhag dal haint brech yr ieir.  

Mae plant a aned rhwng 1 Ionawr 2020 a 31 Awst 2022 yn cael cynnig un dos o’r brechlyn MMRV. Mae’r rhaglen yn rhedeg rhwng 1 Tachwedd 2026 a 31 Mawrth 2028.  

Mae hyn yn dilyn cyngor gan y Cyd-bwyllgor ar Imiwneiddio a Brechu (JCVI). Pwyllgor cynghori gwyddonol arbenigol yw’r Cyd-bwyllgor ar Imiwneiddio a Brechu sy’n cynghori Llywodraeth y DU ar faterion yn ymwneud â brechiadau ac imiwneiddio.  

Disgwylir i’r rhaglen dal i fyny ddetholus ar gyfer MMRV helpu i gyflymu’r rheolaeth a lleihau ymhellach y modd y mae’n trosglwyddo ymhlith y boblogaeth. Bydd plant yn cael eu gwahodd a’u hannog i fynd os nad ydynt wedi dal haint brech yr ieir neu os nad ydynt wedi cael dau ddos ​​o frechlyn farisela eto. 

Gwybodaeth:

I gael rhagor o wybodaeth am y rhaglen hon, gweler yr adran ‘Brechlyn MMRV – Rhaglen dal i fyny ddetholus ar gyfer brechu rhag farisela (brech yr ieir) yn rhedeg o fis Tachwedd 2026 i fis Mawrth 2028’.  

Ar 1 Ionawr 2026, disodlodd y brechlyn rhag y frech goch, clwy’r pennau, rwbela a farisela (brech yr ieir) (MMRV) y brechlyn rhag y frech goch, clwy’r pennau a rwbela (MMR) yn yr amserlen imiwneiddio reolaidd i blant yng Nghymru. Mae’r rhaglen MMRV reolaidd yn helpu i atal achosion difrifol a chymhlethdodau difrifol eraill sy’n gysylltiedig â farisela a all, er eu bod yn brin, arwain at dderbyniad i’r ysbyty neu at ganlyniadau difrifol eraill.  

Gwybodaeth:

I ddysgu rhagor am y rhesymau dros y newidiadau hyn, gweler:

Argymhellir rhoi dau ddos ​​o frechlyn sy’n cynnwys MMR i roi’r amddiffyniad gorau rhag y frech goch.

Yn 2025, roedd 92.5% o blant ysgolion cynradd Cymru wedi cael y dos cyntaf o’r brechlyn MMR, ac roedd 91.2% wedi cael yr ail ddos. 

Roedd 95.8% wedi cael y dos cyntaf ymhlith plant ysgolion uwchradd, ac roedd 93.0% wedi cael yr ail ddos. 

Dros y blynyddoedd diwethaf, mae Cymru wedi profi achosion achlysurol o’r frech goch yn gysylltiedig â theithio rhyngwladol, yn ogystal â brigiadau bach o achosion yn lleol. Cadarnhawyd dau achos o’r frech goch yn 2025, ac adroddwyd am bum achos rhwng Ionawr a Medi 2026. 

Gwneud i Bob Cyswllt Gyfrif (MECC) 

Dylai pob gweithiwr gofal iechyd proffesiynol wneud i bob cyswllt gyfrif a manteisio ar gyfleoedd sy’n bodoli i wirio statws brechiadau, a rhoi brechiadau neu drefnu brechiadau ar gyfer: 

  • pob plentyn ac oedolyn ifanc nad yw wedi cael ei frechu
  • newydd-ddyfodiaid i’r DU wrth gofrestru gyda phractis cyffredinol ac yn ystod asesiadau mewnfudo
  • menywod ôl-enedigol trwy asesiadau gan ymwelwyr iechyd ac apwyntiadau chwe wythnos ar ôl geni’r baban 
  • menywod sy’n defnyddio gwasanaethau cyn cenhedlu neu ffrwythlondeb. 
  • Dylid defnyddio’r brechlyn MMR i amddiffyn menywod o oedran magu plant a gweithwyr gofal iechyd rhag haint rwbela. 

Y clefydau 

Mae’r frech goch, clwy’r pennau a rwbela yn glefydau hysbysadwy yng Nghymru. 

Y frech goch 

Mae’r frech goch yn un o’r clefydau trosglwyddadwy mwyaf heintus. Mae’r clefyd yn cael ei ledaenu drwy drosglwyddiad drwy’r awyr neu drwy ddefnynnau. Mae ganddo gyfnod magu o oddeutu deg diwrnod.

Mae’r frech goch yn cael ei hachosi gan morbilifeirws sy’n perthyn i’r teulu paramycsofeirws. Nodweddir y cyfnod rhagarwyddol gan dwymyn yn dechrau, anhwylder, annwyd, llid yr amrannau a pheswch. Mae’r frech yn dechrau ar y pen, ac yna’n lledaenu i’r trwnc a’r aelodau dros gyfnod o dri i bedwar diwrnod.

Gall smotiau Koplik (smotiau bach coch gyda chanol glas/gwyn) ymddangos ar bilenni mwcaidd y geg un i ddau ddiwrnod cyn i’r frech ymddangos.

Mae unigolion yn heintus o ddechrau’r cyfnod rhagarwyddol (pan fydd y symptom cyntaf yn ymddangos) hyd at bedwar diwrnod ar ôl ymddangosiad y frech.

Mae’r nodweddion canlynol yn arwyddion cryf bod y frech goch ar unigolyn:

  • brech sy’n para am o leiaf dri diwrnod
  • twymyn sy’n para am o leiaf diwrnod, ac
  • o leiaf un o’r symptomau canlynol – peswch, annwyd neu lid yr amrannau.
 Clwy’r pennau 

Mae clwy’r pennau yn salwch feirysol acíwt sy’n cael ei achosi gan baramycsofeirws, sy’n cael ei nodweddu gan chwydd yn y chwarennau parotid. Gall symptomau fel twymyn, cur pen/pen tost, anhwylder, myalgia a diffyg archwaeth ymddangos hefyd. Mae achosion asymptomatig yn gyffredin mewn plant.

Mae clwy’r pennau yn lledaenu trwy drosglwyddiad trwy’r awyr neu drwy ddefnynnau. Mae ganddo gyfnod magu o oddeutu 17 diwrnod. Mae pobl yn heintus o ychydig ddyddiau cyn i’r chwydd ddechrau yn y chwarennau parotid ac am ychydig ddyddiau wedi hynny.

Mae feirws clwy’r pennau yn aml yn effeithio ar y system nerfol. Gall cymhlethdodau niwrolegol ddigwydd, yn cynnwys llid yr ymennydd ac enseffalitis.

Mae cymhlethdodau cyffredin yn cynnwys pancreatitis, öofforitis, ac orcitis. Mae byddardod synwyrnerfol, neffritis, cymalwst, annormaleddau cardiaidd, ac yn anaml, farwolaeth, wedi cael eu hadrodd.

 Rwbela 

Mae rwbela yn cael ei achosi gan togafeirws. Gall ddechrau gyda symptomau amhenodol fel twymyn gradd isel, anhwylder, annwyd, a llid yr amrannau ysgafn. Mae’r frech fel arfer yn para am gyfnod byr, ac i’w weld y tu ôl i’r clustiau, ar yr wyneb ac ar y gwddf. Gall diagnosis clinigol fod yn annibynadwy oherwydd natur fyrhoedlog y frech.

Mae rwbela yn lledaenu trwy ddefnynnau anadlol. Mae ganddo gyfnod magu o 14 i 21 diwrnod.

Mae cymhlethdodau’n cynnwys lefel isel o blatennau yn y gwaed (thrombocytopenia) ac enseffalitis ar ôl yr haint. Gall arthritis ac arthralgia ddigwydd mewn oedolion.

Gall haint rwbela yn ystod beichiogrwydd arwain at golli’r ffetws neu Syndrom Rwbela Cynhenid ​​(CRS), sy’n gallu achosi cataractau, byddardod, annormaleddau cardiaidd, microceffali, arafwch twf, a briwiau llidiol. Gall haint yn ystod wyth i ddeg wythnos gyntaf beichiogrwydd achosi niwed mewn hyd at 90% o fabanod sy’n goroesi, gan arwain yn aml at nifer o namau.

Brech yr ieir

Mae varicella (brech yr ieir) yn glefyd acíwt, heintus iawn a achosir gan y feirws varicella zoster. Mae varicella yn lledaenu trwy gyswllt uniongyrchol neu ddefnynnau, gyda chyfnod magu o un i dair wythnos.

Gall twymyn ysgafn a theimlad o anhwylder ddigwydd cyn y frech, sy’n dechrau ar yr wyneb a chroen y pen, gan ledaenu i’r trwnc a’r abdomen. Mae’r frech yn para am dri i bedwar diwrnod, yna’n sychu’n grachod, a gall fod yn wasgarog neu’n doreithiog.

Mae varicella yn fwy difrifol mewn babanod ifanc iawn, oedolion, menywod beichiog (sy’n effeithio ar y fam a’r ffetws), ac oedolion imiwnoataliedig.

Ond mae’r rhan fwyaf o achosion varicella (brech yr ieir) mewn plant yn ysgafn ac yn gwella heb driniaeth feddygol. Mae rhai plant yn datblygu cymhlethdodau, fel heintiau croen bacteriol, enseffalitis, niwmonitis, a strôc, a allai arwain at arhosiad yn yr ysbyty neu, yn anaml, marwolaeth.

Mae data’n dangos bod heintiau varicella difrifol yn aml yn arwain at gymhlethdodau sy’n gyffredin ac yn ddrud, sy’n ychwanegu at y straen ar wasanaethau gofal iechyd. Mae’n debygol nad yw’r nifer gwirioneddol o dderbyniadau i’r ysbyty oherwydd varicella yn cael ei adrodd yn ddigonol. Mae llawer o’r derbyniadau hyn i’r ysbyty yn deillio o gymhlethdodau eilaidd fel heintiau streptococol grŵp A ymledol neu strôcs yn ystod plentyndod, nad ydynt yn aml yn cael eu cofnodi fel rhai sy’n gysylltiedig â varicella. Efallai y bydd cymhlethdodau eilaidd eraill hefyd sy’n gysylltiedig â varicella nad ydynt wedi’u cofnodi na’u deall yn llawn gyda’r data presennol.

Mae herpes zoster (yr eryr) yn deillio o ail-actifadu feirws varicella (brech yr ieir). Mae’n fwy cyffredin ymhlith yr henoed ac unigolion imiwnoataliedig. Mae gan y DU raglen frechu gyffredinol rhag yr eryr ar waith ers 2013 mewn oedolion hŷn. Am fwy o wybodaeth, ewch i Yr eryr – Gwybodaeth i weithwyr iechyd

Y brechlynnau

Brechlyn MMRV – Rhaglen dal i fyny ddetholus ar gyfer brechu rhag farisela (brech yr ieir) yn rhedeg o fis Tachwedd 2026 i fis Mawrth 2028

Mae GIG Cymru yn cynnig rhaglen dal i fyny am gyfnod cyfyngedig ar gyfer farisela (brech yr ieir) gan ddefnyddio’r brechlyn MMRV cyfun. Mae hyn er mwyn helpu i amddiffyn plant cymwys rhag dal haint brech yr ieir. 

Mae plant a aned rhwng 1 Ionawr 2020 a 31 Awst 2022 yn cael cynnig un dos o’r brechlyn MMRV. Roedd y plant hyn yn rhy hen i gael cynnig brechiad rheolaidd brech yr ieir pan gafodd ei gyflwyno i amserlen imiwneiddio plant y DU yn gynharach eleni.  

Os nad yw’r grŵp hwn o blant wedi dal brech yr ieir nac wedi cael eu brechu rhag brech yr ieir, maent mewn perygl o ddal yr haint. 

Disgwylir i’r rhaglen dal i fyny ddetholus MMRV gyflymu’r rheolaeth ar haint brech yr ieir, lleihau trosglwyddiad, a darparu amddiffyniad i blant cymwys sy’n parhau i allu dal brech yr ieir. 

Bydd y rhaglen hon yn rhedeg rhwng 1 Tachwedd 2026 a 31 Mawrth 2028. Mae’n seiliedig ar y Cyd-bwyllgor ar Imiwneiddio a Brechu (JCVI) (safle allanol, Saesneg yn unig) ac mae wedi’i amlinellu yn  

Dylid rhoi gwybod i rieni a gwarcheidwaid am eu cymhwysedd erbyn 31 Mawrth 2027 fan bellaf. 

Pwy ddylai gael cynnig y brechlyn dal i fyny detholus MMRV?

Dylid cynnig un  dos o’r brechlyn MMRV i blant a aned rhwng 1 Ionawr 2020 a 31 Awst 2022 (y rhai rhwng 3 blwydd a 4 mis oed a than 6 oed ar 1 Ionawr 2026). Diffinnir eu cymhwysedd gan eu dyddiad geni, yn hytrach na’u hoedran. 

Dylid cynnig y brechlyn i blant sydd: 

  • heb hanes o gael haint brech yr ieir a/neu  
  • heb gael dau ddos ​​o’r brechlyn farisela o’r blaen. 

Nid oes raid i bractisiau meddygon teulu wirio a yw plentyn wedi dal haint brech yr ieir neu wedi cael dau ddos ​​o’r brechlyn farisela cyn anfon gwahoddiad ato. Gellir cadarnhau cymhwysedd os yw’r plentyn yn ymateb i’r cynnig. Nid oes gofyniad i bractisiau meddygon teulu wirio hanes haint brech yr ieir yr unigolyn drwy gynnal profion seroleg.  

Os oes ansicrwydd ynghylch a yw’r plentyn wedi dal haint brech yr ieir o’r blaen, gellir cynghori’r rhieni ei bod yn ddiogel ac yn well i’w plentyn gael y brechlyn dal i fyny detholus MMRV. 

  • Dylai’r plentyn fod wedi cael dau frechiad MMR o’r blaen. Nid oes pryderon diogelwch yn bodoli o ran cael tri brechlyn sy’n cynnwys MMR. 
  • Nid oes pryderon diogelwch yn bodoli ynghylch rhoi’r brechlyn i blentyn sydd eisoes wedi dal haint brech yr ieir neu wedi cael brechiad rhag farisela o’r blaen.  

Y brechlynnau a gynigir yw: 

Mae’n bwysig adolygu cofnod brechu’r plentyn a chynnig unrhyw frechiadau y mae heb eu cael.  

Dylid rhoi unrhyw frechiadau a gollwyd gan ddefnyddio safle Asiantaeth Diogelwch Iechyd y DU – Brechiadau i unigolion y mae ansicrwydd ynghylch imiwneiddiadau neu y mae’r imiwneiddiadau’n anghyflawn – GOV.UK (safle allanol, Saesneg yn unig)  

Manylion Cyswllt

Os oes gennych gwestiynau, cysylltwch â’ch bwrdd iechyd  Cysylltiadau brechu – Iechyd Cyhoeddus Cymru neu anfonwch e-bost i [email protected]  

Gwybodaeth ac adnoddau pellach i gefnogi cyflwyno’r rhaglen frechu un dos rhag brech yr ieir ar gyfer plant cymwys: 

Brechlyn MMRV – Brechiadau rheolaidd i blant

Ionawr 2026: Newidiadau i’r Amserlen Imiwneiddio Reolaidd i Blant

Dechreuodd rhaglen frechu reolaidd y GIG rhag farisela (brech yr ieir) ar gyfer babanod ar 1 Ionawr 2026. Y brechlyn a gaiff ei ddefnyddio yw’r brechlyn MMRV cyfun ar gyfer y frech goch, clwy’r pennau, rwbela a farisela.  

Mae’r brechlyn MMRV yn cynnwys feirysau byw gwanedig y frech goch, clwy’r pennau, rwbela a farisela. 

Mae’r brechlyn MMRV wedi cael ei ddefnyddio mewn gwledydd eraill gan gynnwys UDA, Canada, Awstralia a’r Almaen ers blynyddoedd lawer. Mae gwledydd sydd wedi gweithredu rhaglenni brechu rhag farisela wedi nodi gostyngiad sylweddol mewn achosion o farisela a’r derbyniadau i’r ysbyty cysylltiedig. 

  • Rhoddir y dos cyntaf o MMRV i fabanod yn 12 mis oed a’r ail ddos ​​yn 18 mis oed. 

I gael gwybodaeth am bolisi a chanllawiau sy’n ymwneud â chyflwyno rhaglen frechu MMRV, gweler: 

Crynodeb o nodweddion cynnyrch y brechlyn MMRV

Mae amserlen imiwneiddio reolaidd i blant y GIG yng Nghymru yn defnyddio dau frechlyn MMRV, sef: 

Mae canllawiau yn y Llyfr Gwyrdd yn disodli’r crynodeb o nodweddion cynnyrch (SmPC). 

Ystyrir bod y brechlynnau’n gyfwerth yn glinigol ac yn gyfnewidiol, er y gallai Priorix Tetra® fod yn well ar gyfer plant nad ydynt yn derbyn gelatin moch.

Ni chynigir brechlyn ‘farisela yn unig’ yn rhaglenni rheolaidd na detholus y GIG. 

Brechlyn MMR – brechiadau nad ydynt yn rhai rheolaidd

Mae’r brechlyn MMR yn baratoad byw o’r frech goch, clwy’r pennau a rwbela wedi’u sychrewi ar ffurf brechlyn gwanedig byw. 

Mae’r brechlyn MMR, sy’n helpu i amddiffyn rhag y frech goch, clwy’r pennau a rwbela, yn hynod effeithiol ac mae ganddo record diogelwch rhagorol. Ers iddo gael ei gyflwyno ym 1988, mae’r frech goch, clwy’r pennau a rwbela wedi dod yn anghyffredin yn y DU. Ond weithiau mae brigiadau o achosion yn digwydd, yn enwedig o’r frech goch, pan nad yw digon o bobl yn cael eu brechu. 

Nid yw’r brechlyn MMR ar gael mwyach drwy’r rhaglen imiwneiddio rheolaidd i blant y GIG. 

Mae’r brechlyn MMR yn dal i fod ar gael i’w roi y tu allan i’r rhaglen imiwneiddio rheolaidd i blant i’r bobl sydd ei angen. Mae hyn yn cynnwys plant hŷn ac oedolion sydd heb gael dau ddos ​​o’r brechlyn MMR ac nad ydynt yn gymwys i gael y brechlyn MMRV. 

Crynodeb o nodweddion cynnyrch y brechlyn MMR

Defnyddir dau frechlyn MMR yn y DU ar hyn o bryd. Gelwir y rhain yn MMRVAXPRO® (safle allanol, Saesneg yn unig) a Priorix® (safle allanol, Saesneg yn unig). Mae MMRvaxPro® yn cynnwys gelatin moch. Nid yw Priorix® yn cynnwys gelatin. 

Mae canllawiau yn y Llyfr Gwyrdd yn disodli’r crynodeb o nodweddion cynnyrch (SmPC). 

Mae rhagor o wybodaeth am y brechlynnau sy’n cynnwys MMR ar gael ym mhenodau’r Llyfr Gwyrdd ar gyfer pob clefyd. Gweler yr adran adnoddau a gwybodaeth glinigol.

Adrodd am sgil-effeithiau brechlynnau sy’n cynnwys MMR

Mae’n bwysig rhoi gwybod am adweithiau niweidiol a amheuir ar ôl awdurdodi cynnyrch meddyginiaethol. Mae’n galluogi i gydbwysedd budd/risg y cynnyrch meddyginiaethol gael ei fonitro’n barhaus. Dylech adrodd am amheuon am sgil-effeithiau brechlynnau a meddyginiaethau ar-lein yn Cerdyn Melyn (safle allanol, Saesneg yn unig), drwy lawrlwytho ap y Cerdyn Melyn neu drwy ffonio 0800 731 6789 (dydd Llun i ddydd Gwener, 9am i 5pm).  

Mae gan feddyginiaethau a brechlynnau newydd sy’n destun monitro ychwanegol symbol triongl du â’i ben i lawr (▼) ar y daflen yn y pecyn a’u Crynodeb o Nodweddion y cynnyrch (SmPC), ynghyd â brawddeg fer yn esbonio ystyr y triongl. Dylech roi gwybod am unrhyw adweithiau niweidiol a amheuir mewn perthynas â’r cynhyrchion hyn.   

Canllawiau

I gael manylion ynghylch newidiadau i’r amserlen imiwneiddio reolaidd i blant, gweler:   

Canllawiau Iechyd Cyhoeddus Cymru  

I gael manylion am yr amserlen imiwneiddio reolaidd yng Nghymru, ewch i Amserlenni imiwneiddio arferol i Gymru. 

Gellir dod o hyd i bolisi a chanllawiau hefyd ar dudalen Polisi, llythyrau a Llywodraeth Cymru SharePoint Iechyd Cyhoeddus Cymru (mynediad i staff gofal iechyd y GIG)  

Mae offeryn cymhwysedd i gefnogi gweithwyr gofal iechyd proffesiynol wrth weithredu’r rhaglenni rheolaidd a’r rhaglenni dal i fyny ar gyfer y brechlyn MMRV o 1 Ionawr 2026 ar gael yn: 

Cwestiynau Cyffredin (sharepoint.com) (mynediad i staff gofal iechyd y GIG) 

Adnoddau hyfforddi a digwyddiadau 

Mae Iechyd Cyhoeddus Cymru wedi cynhyrchu sesiynau codi ymwybyddiaeth i weithwyr gofal iechyd proffesiynol ar y brechlyn MMRV a’r frech goch:  

  • Setiau sleidiau wedi’u recordio, gweminarau, a sleidiau hyfforddi  

Gellir cael mynediad at y rhain trwy’r dudalen E-ddysgu a’r dudalen Adnoddau Hyfforddi a Digwyddiadau. 

Adnoddau a gwybodaeth glinigol

Adnoddau ar y frech goch 

Adnoddau Iechyd Cyhoeddus Cymru: 

Adnoddau allanol: 

Adnoddau ar glwy’r pennau 

Adnoddau ar rwbela 

Adnoddau ar varicella (brech yr ieir) 

Adnoddau brechlyn MMRV ac MMR 

Adnoddau MMR ar gyfer carchardai

Cyfarwyddiadau grwp cleifion a phrotocolau

Gellir dod o hyd i dempledi PGD ar gyfer brechlynnau ar dudalen Gwasanaeth Cyngor ar Feddyginiaethau Cymru (safle allanol).

Rhagor o adnoddau a gwybodaeth clinigol

Adnoddau ar gyfer plant oed ysgol

Data a goruchwyliaeth

Cwestiynau Cyffredin 

Gwybodaeth:

I weld cwestiynau cyffredin am y rhaglen frechu MMRV, ewch i:

A ellir rhoi brechlynnau sy’n cynnwys MMR i fabanod o dan 12 mis oed?

Dylid rhoi brechlynnau sy’n cynnwys MMR fel mater o drefn yn unol â’r amserlen imiwneiddio plant.   

Ni roddir brechlynnau sy’n cynnwys MMR i fabanod o dan 12 mis oed fel arfer. Y rheswm am hyn yw oherwydd y gall yr imiwnedd (amddiffyniad) maen nhw’n ei gael gan eu mam wneud y brechlyn yn llai effeithiol.   

Weithiau gellir cynnig brechlyn sy’n cynnwys MMR i blant iau. Er enghraifft, cyn iddynt deithio i ardaloedd lle mae’r frech goch yn gyffredin neu yn ystod brigiad o achosion.   

Dylai plentyn sy’n cael brechlyn sy’n cynnwys MMR cyn iddo gyrraedd 12 mis oed gael dau ddos ​​arall ar yr oedrannau a argymhellir er mwyn iddo gael yr amddiffyniad gorau.  

Cysylltwch â’ch practis meddyg teulu i gael cyngor os ydych chi’n teithio i wlad neu ardal lle mae’r frech goch yn glefyd endemig, neu os oes gennych chi gwestiynau am gymhwysedd. 

Adolygwyd y dudalen hon ddiwethaf: 14eg Hydref 2026