Lleihau eich risg o ddiabetes math 2
Mae gan un o bob pump o oedolion yng Nghymru ddiabetes neu ar y llwybr i ddatblygu’r cyflwr. Ond, yn aml, mae’n bosib atal diabetes math 2 – a’r cam cyntaf yw adnabod eich risg.
Adnabod eich risg
Mae’n rhad ac am ddim ac mae’n cymryd dwy funud yn unig.
Mae’r offeryn Adnabod Eich Risg am ddim gan Diabetes UK yn rhoi sgôr risg bersonol i chi yn seiliedig ar gwestiynau syml am eich oedran, hanes eich teulu, maint eich canol, ac ychydig o ffactorau eraill. Nid oes angen prawf gwaed. Ni chaiff eich atebion eu storio na’u rhannu.
Unwaith y byddwch wedi cael eich sgôr, byddwch yn cael arweiniad gan elusen Diabetes UK ar ba gamau i’w cymryd nesaf. Yna gallwch ddod yn ôl i’r dudalen hon i’ch helpu i ddod o hyd i’r cymorth iawn i chi.
Beth mae eich canlyniad ‘Adnabod Eich Risg’ yn ei olygu
Risg isel neu gymedrol — rydych chi mewn lle da, ond mae dal yn werth bod yn ymwybodol o’r hyn a allai effeithio ar eich risg dros amser. Gall newidiadau bach nawr eich helpu i aros yn iach.
Risg uchel neu uchel iawn — nid yw hyn yn golygu y byddwch yn datblygu diabetes math 2. Mae’n golygu bod nawr yn amser da i gael cymorth. Bydd yr offeryn risg yn rhoi llythyr i chi y gallwch fynd i’ch meddyg teulu a fydd yn gallu gwneud prawf gwaed syml i fesur lefelau siwgr yn eich gwaed. Yna bydd eich meddyg teulu’n cynllunio’r camau nesaf gyda chi.
Cymorth sydd ar gael yng Nghymru
Mae cymorth ar gael yng Nghymru, ac mae’n gweithio.
Rhaglen Atal Diabetes Cymru Gyfan
Os bydd eich meddyg teulu yn eich nodi fel rhywun sydd mewn risg uchel trwy brawf gwaed, efallai y byddwch yn cael eich atgyfeirio at Rhaglen Atal Diabetes Cymru Gyfan (AWDPP). Mae hwn yn apwyntiad rhad ac am ddim, gyda gweithiwr cymorth gofal iechyd hyfforddedig yn eich ardal leol, lle cewch eich cefnogi i osod nodau personol i leihau eich risg. Mae pobl sy’n mynd i’r apwyntiadau yn lleihau eu risg o ddatblygu diabetes math 2 bron i chwarter.
Mae’r rhaglen ar gael mewn sawl ardal o Gymru ar hyn o bryd. Siaradwch â’ch tîm Gofal Sylfaenol i weld a yw’r rhaglen ar gael yn eich ardal chi ac a allech chi fod yn gymwys i gymryd rhan.
Let’s Prevent Diabetes
Rhaglen addysg ar-lein am ddim i unrhyw un 18 oed neu’n hŷn sy’n byw yng Nghymru ac sydd mewn perygl o ddatblygu diabetes math 2. Dysgwch am sut i leihau eich risg, ar eich cyflymder eich hun, yn eich amser eich hun.
Pwysau Iach, Byw’n Iach
Mae cyrraedd a chynnal pwysau iach yn dod â llawer o fanteision gwych, yn cynnwys lleihau eich risg o ddiabetes math 2. Cymerwch y cam cyntaf tuag at bwysau iach gyda chyngor arbenigol am ddim wedi’i deilwra i chi gan y GIG. Ymunwch heddiw â’r degau o filoedd o bobl ledled Cymru sydd eisoes ar eu taith.
Helpa Fi i Stopio
Rhoi’r gorau i ysmygu yw’r peth gorau y gallwch chi ei wneud er lles eich iechyd, gan gynnwys lleihau eich risg o gael diabetes math 2. Mae Helpa Fi i Stopio yn wasanaeth rhad ac am ddim, heb farnu. Mae yma i’ch helpu i roi’r gorau iddi am byth gyda chefnogaeth arbenigol y GIG wedi’i theilwra i chi. Mae dros 100,000 o bobl eisoes wedi rhoi’r gorau iddi am byth gyda Helpa Fi i Stopio, ac wedi gwella eu hiechyd ac arbed miloedd o bunnoedd bob blwyddyn.
Camau Bach
Os ydych chi wedi cael diabetes yn ystod beichiogrwydd, mae eich risg o ddatblygu diabetes math 2 yn uwch. Mae Camau Bach yn rhaglen ar-lein am ddim sydd wedi’i chynllunio’n benodol ar eich cyfer chi.
Does dim rhaid i chi wneud hyn ar eich pen eich hun
Mae llawer o bethau yn dylanwadu ar y risg o ddatblygu diabetes math 2 – hanes eich teulu, ble rydych chi’n byw, eich amgylchiadau, yn ogystal â’ch ffordd o fyw. Nid mater o ewyllys na dewis personol yn unig yw hi. Mae’r gefnogaeth ar y dudalen hon yma i’ch helpu i gymryd camau sy’n teimlo’n realistig ac yn gyraeddadwy ar gyfer eich bywyd.
Siaradwch â’ch meddyg teulu os yw eich sgôr risg yn uchel, neu os oes gennych symptomau fel mwy o syched, yr angen i basio wrin yn aml, blinder anesboniadwy, neu glwyfau sy’n gwella’n araf.
Ydych chi eisoes yn byw gyda diabetes?
Os ydych chi eisoes wedi cael diagnosis, mae cefnogaeth ar gael i’ch helpu i fyw’n dda.
Pam mae hyn yn bwysig?
Diabetes math 2 yw un o heriau iechyd mwyaf brys Cymru – mae hefyd yn un o’r rhai mwyaf ataliadwy. Bellach mae 230,371 o bobl wedi cael diagnosis o ddiabetes yng Nghymru. Mae’r ffigwr hwn yn codi’n gyflymach nag a ragwelwyd. Mae 269,747 arall yn byw gyda chyflwr cyn-ddiabetes, ac amcangyfrifir bod gan 58,906 o bobl ddiabetes Math 2 yn ddiarwybod iddynt. Mae hynny’n golygu bod y cyflwr yn effeithio ar un o bob pump o oedolion yng Nghymru.
Gall diabetes achosi colli golwg, methiant yr arennau, trawiad ar y galon a strôc. Mae’n byrhau bywydau. Ond nid oes rhaid iddo.
Gyda gwybodaeth gynnar a’r gefnogaeth gywir, gellir atal diabetes Math 2 yn aml – neu, yn achos y rhai sydd eisoes wedi cael diagnosis, gellir ei reoli’n dda ac weithiau ei wrthdroi.