Ymyriadau cyn-adsefydlu ar gyfer cleifion ar restrau aros am lawdriniaeth ddewisol: crynodeb o dystiolaeth

Cyheoddiad nesaf: Diweddariad heb ei gynllunio

Cysylltwch ar gyfer ymholiadau ac adborth

Cyflwyniad

Mae amseroedd aros ar gyfer llawdriniaeth ddewisol yn y GIG ar y lefel uchaf erioed. Gall arosiadau hir niweidio iechyd cleifion ac arwain at ganlyniadau gwaeth. Mae cyn-adsefydlu yn golygu helpu cleifion i wella eu hiechyd cyn llawdriniaeth. Mae’n aml yn cynnwys newidiadau i ffordd o fyw fel ymarfer corff, maeth, rhoi’r gorau i ysmygu, a chymorth i leihau risgiau, gwella canlyniadau llawfeddygol, cynorthwyo adferiad a llesiant hirdymor.

Datblygwyd y crynodeb tystiolaeth hwn ar y pwnc i nodi pa ymyriadau cyn-adsefydlu ar gyfer oedolion ar restrau aros am lawdriniaeth ddewisol sy’n effeithiol, a pha nodweddion neu elfennau sy’n gwneud yr ymyriadau hyn yn llwyddiannus.

Prif bwyntiau

Pa mor gyfredol yw’r dystiolaeth hon?

Cynhaliwyd yr adolygiad hwn yn 2023 ac mae’n cynnwys tystiolaeth a gyhoeddwyd rhwng 2013 a 2023.

Beth wnaethom ddarganfod?

• Yn gyfan gwbl, cynhwyswyd 57 o astudiaethau cynradd, gyda 12 o’r DU ac yr un o Gymru.
•  Cynhyrchwyd naw crynodeb tystiolaeth yn cwmpasu ystod o ymyriadau cyn-adsefydlu, gan gynnwys cymorth seicolegol, therapïau amgen, a newidiadau i ffordd o fyw megis ymarfer corff, maeth, a rhoi’r gorau i ysmygu. Darparwyd y rhain ar eu pen eu hunain neu mewn cyfuniad ar draws gwahanol arbenigeddau llawfeddygol.
• Cynhyrchwyd adroddiad ar wahân yn crynhoi tystiolaeth y DU yn unig.
• Mae’r adran hon yn rhoi trosolwg byr; cyfeiriwch at yr adroddiad llawn ar gyfer datganiadau tystiolaeth manwl ar gyfer pob categori o ymyriad.

Beth mae hyn yn ei olygu?

• Roedd y sail dystiolaeth yn amrywio yn ôl ymyriad a chanlyniad, felly dylid ystyried y canfyddiadau fel rhai dangosol yn hytrach na chadarn.
• Mae’r crynodebau tystiolaeth hyn ar bynciau wedi’u bwriadu i gefnogi gwneud penderfyniadau ar lefel genedlaethol a lleol drwy roi trosolwg eang o ba ymyriadau sydd wedi’u hastudio a lle mae’r dystiolaeth yn ymddangos yn addawol. Gellir eu defnyddio i gychwyn trafodaethau cynnar am wasanaethau a rhaglenni, tynnu sylw at opsiynau a allai fod yn werth eu harchwilio’n lleol, a nodi dulliau sydd, yn ôl y dystiolaeth bresennol, yn awgrymu y dylid eu hosgoi am y tro.
• Nid yw’r crynodebau tystiolaeth hyn wedi’u cynllunio i’w defnyddio ar eu pen eu hunain i ddyrannu adnoddau na gwneud cymariaethau manwl rhwng blaenoriaethau cystadleuol. Nid ydynt yn darparu gwybodaeth fanwl am ansawdd astudiaethau, costau na maint effeithiau, ac nid ydynt wedi’u cynllunio i gynnig argymhellion wedi’u teilwra’n lleol. Hefyd, nid ydynt yn anelu at gwmpasu pob ymyriad posibl.

Gwybodaeth dechnegol

Mae’r crynodeb tystiolaeth hwn ar y pwnc yn seiliedig ar astudiaethau o adolygiad cyflym gan Okolie et al. (2022) a chwiliad ychwanegol a gwblhawyd ym mis Mawrth 2023. Am fanylion llawn y chwiliad, y meini prawf cynnwys, yr asesiad ansawdd, a’r synthesis, cyfeiriwch at y prif adroddiad.

Cynhwyswyd astudiaethau Saesneg a gyhoeddwyd o 2011 ymlaen, gan ganolbwyntio ar ymyriadau cyn-adsefydlu sydd â chydran addysgol mewn gwledydd yr OECD. Cafodd astudiaethau eu sgrinio yn erbyn ein meini prawf, eu grwpio yn ôl ymyriad a math o lawdriniaeth, a chafodd data eu tynnu allan. Defnyddiwyd allwedd “golau traffig” syml i ddangos beth mae’r dystiolaeth gyffredinol yn ei awgrymu ar gyfer pob canlyniad: Gwyrdd ar gyfer ymyriadau a allai helpu, Melyn ar gyfer y rheini sydd angen mwy o ymchwil, a Coch ar gyfer y rheini sy’n annhebygol o helpu.

Geirfa

Cyn-adsefydlu (prehabilitation neu prehab): Camau y mae’r claf a’u prif weithwyr gofal iechyd yn eu cymryd gyda’i gilydd cyn triniaeth neu lawdriniaeth i wella eu llesiant corfforol a meddyliol. Fel arfer, mae hyn yn cynnwys ymarfer corff, cefnogaeth faethol, rhoi’r gorau i ysmygu, a pharatoi seicolegol i wella adferiad a lleihau cymhlethdodau.

Gwledydd yr OECD: Mae’r Sefydliad ar gyfer Cydweithredu a Datblygu Economaidd (OECD) yn cynnwys 38 o wledydd aelod, yn bennaf economïau datblygedig sy’n seiliedig ar y farchnad ac wedi ymrwymo i egwyddorion democrataidd. Maent yn dueddol o fod â systemau iechyd tebyg, gan wneud ymchwil yn fwy cymaradwy â’r DU.