Gwerthusiad Ffurfiannol a Seiliedig ar Werth o’r Broses o Gyflwyno Cam 1 Rhaglen Atal Diabetes Cymru Gyfan

• Cymru Gyfan/Cenedlaethol

Mae’r adroddiad hwn yn cyflwyno gwerthusiad ffurfiannol a seiliedig ar werth o’r broses o gyflwyno Cam 1 Rhaglen Atal Diabetes Cymru Gyfan (AWDPP) a ariannwyd gan Iechyd Cyhoeddus Cymru (PHW)

Yng Nghymru, cafodd y rhaglen atal diabetes genedlaethol yn seiliedig ar ymyriad ffordd o fyw byr ei datblygu yn dilyn gwaith treialu a gynhaliwyd yng nghlystyrau gofal sylfaenol Cwm Afan a Gogledd Ceredigion. Fel rhan o ymyriad AWDPP, defnyddir dull systematig i ganfod oedolion sy’n wynebu risg o ddatblygu Diabetes Mellitus Math 2 (T2DM) ar sail mesuriad HbA1c rhwng 42 a 47 mmol/mol, h.y., yr ystod cyn-ddiabetes, a chynnig sgwrs 30 munud sy’n canolbwyntio ar yr unigolyn i drafod ei ffordd o fyw (naill ai wyneb yn wyneb, dros y ffôn neu drwy alwad fideo) gan edrych yn benodol ar ddeiet a lefelau gweithgarwch corfforol. Y bwriad yw bod yr ymyriad yn cael ei ddarparu gan Weithiwr Cymorth Gofal Iechyd penodedig sydd wedi cael hyfforddiant hanfodol er mwyn helpu i ddarparu ymyriad AWDPP. Yna, gall defnyddwyr gwasanaeth gael eu hatgyfeirio at raglenni hybu iechyd / addasu ffordd o fyw sy’n bodoli’n barod, fel y Rhaglen Atgyfeirio Cleifion i Wneud Ymarfer Corff (NERS), gwasanaethau rheoli pwysau, neu raglen addysg ddigidol ryngweithiol Let’s Prevent Diabetes.
Caiff y gwaith o gyflwyno AWDPP yn genedlaethol ei arwain gan Is-adran Gofal Sylfaenol, Iechyd Cyhoeddus Cymru a chaiff y rhaglen ei darparu gan dimau deietig cymunedol Byrddau Iechyd lleol, drwy glystyrau gofal sylfaenol ym mhob un o’r saith Bwrdd Iechyd yng Nghymru.