Ein Cynllun Cydraddoldeb Strategol a’n Hamcanion 2020 i 2024

Croeso i’n cynllun cydraddoldeb strategol a’n hamcanion ar gyfer y pedair blynedd nesaf a diolch i bawb a dreuliodd yr amser i gyfrannu eu syniadau, eu meddyliau a’u sylwadau. Bellach mae gennym syniad gwell o lawer o sut yr hoffech chi weithio gyda ni yn y dyfodol ac, yn bwysicach fyth, am y cynnydd rydych chi’n disgwyl i ni ei wneud.

Rydym yn cydnabod yr anghydraddoldebau sy’n wynebu rhai grwpiau a chymunedau yng Nghymru ac rydym yn benderfynol o wneud yr hyn a allwn i herio hyn. Byddwn yn parhau i weithio gydag eraill i adeiladu cymunedau mwy cydlynol ledled Cymru a byddwn yn cynnwys pobl sy’n adlewyrchu amrywiaeth ein cymunedau. Ein cam nesaf fydd sefydlu Grŵp Cyfeirio Rhanddeiliaid i lywio a datblygu ein gwaith.