Recriwtio a hyfforddi gweithlu medrus i gyflawni brechu torfol: crynodeb cyflym

Cyheoddiad nesaf: Diweddariad heb ei gynllunio

Cysylltwch ar gyfer ymholiadau ac adborth

Cyflwyniad

Fe wnaethom gynnal y crynodeb cyflym hwn yn ystod camau cynnar pandemig COVID-19. Gwnaethom archwiliad i nodi a chrynhoi tystiolaeth ymchwil er mwyn ateb y cwestiynau canlynol:

• Sut y gellid recriwtio a hyfforddi gweithlu digon mawr ac â’r sgiliau priodol i ddarparu brechu?
• Sut y gellid symbylu myfyrwyr gofal iechyd a gweithwyr gofal iechyd proffesiynol wedi ymddeol?
• A yw rhai dulliau yn well nag eraill?

Prif bwyntiau

Pa mor gyfredol yw’r dystiolaeth hon?

Bu chwiliad am dystiolaeth a gynhaliwyd gennym yn 2020, ac mae’r crynodeb yn cynnwys tystiolaeth o 2012 i 2020.

Beth wnaethom ei ganfod

Nodwyd tri ar ddeg o ffynonellau a oedd yn berthnasol yn fras i gwestiynau’r adolygiad. Ychydig iawn o dystiolaeth ymchwil oedd ar gael ynghylch sut y gellid recriwtio a hyfforddi gweithlu i ddarparu brechu torfol.

Recriwtio

• Mae e-byst torfol, gwahoddiadau personol, a hysbysebion ar wefannau wedi cael eu defnyddio i recriwtio myfyrwyr a gwirfoddolwyr meddygol ar gyfer brechu yn UDA a phrofi COVID-19 yn y Swistir, ond ni chanfuwyd unrhyw wybodaeth am ba mor effeithiol oedd y dulliau hyn.
• Yng Nghymru, gall staff sydd wedi ymddeol gofrestru i ail-ymuno â’r GIG drwy wefan Llywodraeth Cymru.
• Yn UDA, gellir defnyddio’r Medical Reserve Corps, rhwydwaith cenedlaethol o wirfoddolwyr wedi’u trefnu’n lleol sy’n cynnwys gweithwyr proffesiynol meddygol ac iechyd cyhoeddus yn ogystal ag aelodau o’r gymuned heb gefndir meddygol, i gefnogi brechu torfol.
•  Yn y DU, mae Sefydliad Siartredig Iechyd yr Amgylchedd wedi sefydlu cofrestr o bobl sy’n barod i wirfoddoli yn ystod pandemig y coronafeirws, gan gynnwys pobl â sgiliau iechyd cyhoeddus a gweinyddol sy’n gweithio yn y sectorau preifat a busnes.
• Gall staff sy’n cefnogi brechu torfol fod yn gyflogedig neu’n wirfoddolwyr, a gallant gynnwys rolau megis croesawwyr, cyfarwyddwyr traffig, adolygwyr ffurflenni, a rhedwyr cyflenwadau.
• Nododd enghraifft o glinig ysgol yn UDA fod angen pedwar aelod o staff nad ydynt yn glinigol ar gyfer pob un sy’n rhoi brechlyn.
• Pan ddefnyddir myfyrwyr gwirfoddol, gall cylchdroi myfyrwyr drwy glinigau neu ddefnyddio sifftiau pedair awr neu hanner diwrnod helpu i annog gwirfoddoli.

Hyfforddiant

• Mae astudiaethau achos, yn bennaf o UDA, yn awgrymu y gellir hyfforddi myfyrwyr gofal iechyd sy’n gwirfoddoli, gan gynnwys myfyrwyr nyrsio, meddygol a fferylliaeth, i roi brechlynnau gan ddefnyddio dulliau hyfforddi “just-in-time”.
• Mae hyfforddiant “just-in-time” hefyd wedi’i ddefnyddio mewn ymarferion efelychu yn UDA i hyfforddi deintyddion a hylifddyr dannedd y Medical Reserve Corps i roi brechlynnau ac i gyflawni rolau eraill sydd eu hangen ar gyfer modelau dosbarthu mewn pwyntiau darparu.
• Cymharodd un astudiaeth fach heb ei hapdrefnu hyfforddiant imiwneiddio wyneb yn wyneb ar gyfer fferyllwyr â model “hyfforddi’r hyfforddwr” gan ddefnyddio’r un deunyddiau, a chanfuwyd nad oedd gwahaniaeth sylweddol yn nifer y brechlynnau a roddwyd nac yn hyder hunanadroddedig staff.
• Cymharodd astudiaeth beilota ar hap hyfforddiant traddodiadol â hyfforddiant “just-in-time” ar gyfer myfyrwyr fferylliaeth sy’n rhoi brechlyn ffliw i blant mewn lleoliad efelychol, a chanfuwyd nad oedd gwahaniaethau sylweddol mewn cysur, hyder nac mewn cymhwysedd a aseswyd.

Gwybodaeth dechnegol

Gall y crynodeb hwn fod yn ddefnyddiol i nodi pwyntiau allweddol ar y pwnc. Fodd bynnag, nid yw’r ymchwil a gynhwysir wedi’i hasesu o ran ansawdd ac mae’n deillio o ystod eang o ddeunydd cyhoeddedig.