Cyffuriau rheoli pwysau a gofal cynorthwyol: adolygiad cyflym

Cyheoddiad nesaf: Diweddariad heb ei gynllunio

Cysylltwch ar gyfer ymholiadau ac adborth

Cyflwyniad

Mae gordewdra yn dod yn fwy cyffredin yng Nghymru ac mae dulliau effeithiol i helpu pobl i golli pwysau wedi bod yn gyfyngedig hyd yn hyn. Mae meddyginiaethau newydd sy’n cael eu cyflwyno yn y DU, fel semaglutide a tirzepatide, yn gyffuriau GLP-1 sydd wedi cael eu dangos i fod yn effeithiol wrth gefnogi rhai pobl i golli pwysau. Fodd bynnag, mewn profion clinigol, arferid rhoi’r cyffuriau hyn yn aml ochr yn ochr â chymorth ychwanegol (gofal cydran), fel cyngor ar ddiet, rhaglenni gweithgarwch corfforol, neu gynghori ar ymddygiad. I sicrhau bod y meddyginiaethau hyn yn cael eu defnyddio’n effeithiol yn ymarferol, mae angen i ni ddeall pa fathau o gymorth ychwanegol sydd orau pan gaiff eu darparu ochr yn ochr â thriniaethau GLP-1.

Prif bwyntiau

Pa mor gyfredol yw’r dystiolaeth hon?

Cynhaliwyd yr adolygiad hwn yn 2025 ac mae’n cynnwys tystiolaeth a gyhoeddwyd rhwng 2021 a 2025.

Beth wnaethom ei ganfod

• Nodwyd gennym 17 o astudiaethau cynradd yn adrodd ar ganlyniadau colli pwysau sy’n gysylltiedig â chyffuriau GLP-1 ynghyd â chymorth ychwanegol.
• Roedd y rhan fwyaf o’r cymorth ychwanegol yn cynnwys newidiadau i’r diet, nodau ymarfer corff, a chynghori ar ffordd o fyw.
• Nid oedd unrhyw astudiaeth yn mesur yn glir faint o effaith oedd gan y cymorth ychwanegol, ac roedd gwahaniaethau yn y dosau cyffuriau a’r ymyriadau gofal ategol a ddefnyddiwyd ym mhob astudiaeth yn ei gwneud yn anodd eu cymharu. Felly, nid oedd yn bosibl pennu effaith y cymorth ychwanegol ar ganfyddiadau cyffredinol pob astudiaeth.

Beth mae hyn yn ei olygu

• Gall darparu cymorth ychwanegol ddefnyddio llawer o adnoddau’r GIG, felly mae’n bwysig gwybod pa fath o gymorth yw’r mwyaf effeithiol, pryd, ac i bwy.
• Dylai ymchwil yn y dyfodol brofi pa fathau o gymorth ychwanegol sy’n gweithio orau, pa mor hir y dylent bara, ac a ydynt yn helpu pobl i gynnal colli pwysau ar ôl rhoi’r gorau i gymryd y cyffuriau.
• Nid oes llawer o dystiolaeth eto ynghylch cymorth seicolegol ochr yn ochr â chyffuriau colli pwysau, felly mae angen mwy o astudiaethau.
• Dylai ymchwil hefyd edrych ar a yw cymorth ychwanegol yn helpu pobl i wneud newidiadau hirdymor ac osgoi ennill pwysau’n ôl.

Gwybodaeth dechnegol

Cynhaliwyd adolygiad cyflym gennym gan ddefnyddio dulliau adolygiad systematig symlach ond trylwyr i ganfod a chrynhoi tystiolaeth yn gyflym. Gwnaethom chwilio am astudiaethau a oedd yn edrych ar gyffuriau GLP-1 ochr yn ochr â chymorth ychwanegol ar gyfer rheoli pwysau ymhlith oedolion sydd dros bwysau neu’n byw gyda gordewdra.

Geirfa

GLP-1: Mae agonistiaid derbynnydd peptid-1 tebyg i lwcagon (GLP-1 neu GLP-1RAs) yn feddyginiaethau sy’n helpu pobl i deimlo’n fwy llawn drwy efelychu hormon naturiol a ryddheir ar ôl bwyta. Yn y DU, mae sawl meddyginiaeth GLP-1 wedi’u trwyddedu, gan gynnwys semaglutide a tirzepatide (GOV.UK).

Gofal ategol (adjunct care): Mae gofal ategol ym maes iechyd yn cynnwys amrywiaeth o therapïau ac ymyriadau a ddarperir ochr yn ochr â thriniaethau sylfaenol er mwyn gwella eu heffeithiolrwydd a gwella canlyniadau i gleifion.

Adolygiad cyflym: Ffurf ar synthesis tystiolaeth sy’n cyflymu’r broses o gynnal adolygiad systematig traddodiadol er mwyn cynhyrchu tystiolaeth mewn modd amser-sensitif, fel arfer i lywio penderfyniadau gofal iechyd brys.

Adolygiad systematig: Adolygiad sy’n crynhoi’r dystiolaeth ar gwestiwn adolygu wedi’i lunio’n glir yn unol â phrotocol wedi’i ddiffinio ymlaen llaw, gan ddefnyddio dulliau systematig ac eglur i nodi, dewis ac arfarnu astudiaethau perthnasol, ac i echdynnu, dadansoddi, casglu ac adrodd eu canfyddiadau. Gall ddefnyddio technegau ystadegol, megis meta-ddadansoddiad, neu beidio.

Astudiaeth gynradd: Ymchwiliad ymchwil gwreiddiol lle mae ymchwilwyr yn casglu ac yn dadansoddi data yn uniongyrchol (er enghraifft, arolygon, cyfweliadau neu arbrofion), yn hytrach na chrynhoi astudiaethau eraill.