Roedd Cynhadledd Genedlaethol Gwelliant Cymru (10-11 Mai) yn ddathliad o welliant ar draws iechyd a gofal cymdeithasol yng Nghymru a thu hwnt, gan gynnwys siaradwyr gwadd yn ymuno â'r gynhadledd o UDA, yr Alban, Gogledd Iwerddon, Iwerddon, Lloegr a'r Alban.
Cafodd ei darlledu'n fyw o stiwdio yng Nghaerdydd, ac ymunodd cynrychiolwyr ar-lein ac roedd cyfle i rwydweithio a dysgu am ystod eang o bynciau ar yr wybodaeth a'r profiadau diweddaraf ym maes gwella.
Agorwyd y digwyddiad gan Eluned Morgan AS, y Gweinidog Iechyd a Gwasanaethau Cymdeithasol, a ddiolchodd i'r mynychwyr am eu hymrwymiad parhaus i iechyd a gofal yng Nghymru, a dywedodd, “Mae angen i ni ddysgu a gwella gyda'n gilydd. Mae heddiw'n cynnig llawer o gyfleoedd i'n helpu i ddatblygu ein taith ansawdd a diogelwch yng Nghymru.”
Yn ogystal, cyhoeddodd y Gweinidog y bydd Gwobrau GIG Cymru yn dychwelyd ar gyfer 2022 ac anogodd geisiadau o bob cwr o'r wlad i arddangos doniau ein timau iechyd a gofal anhygoel ledled GIG Cymru.
Darganfyddwch fwy am y gwobrau a chyflwyno cais yma.
Mwynhaodd y rhai a fynychodd gyfres o drafodaethau panel a sgyrsiau am rannu arferion gorau timau ac arbenigwyr ledled Cymru a gweddill y byd. Roedd ffocws ar Systemau i Gefnogi a Gwella Diogelwch Cleifion.
Roedd y gynhadledd yn cynnwys sesiynau ar: Diogelwch Cleifion yng Nghymru, Safbwyntiau Diogelwch yn y System, Llif Mwy Diogel, Rheoli er Ansawdd, a Dull System Gyfan tuag at Ddiogelwch. Roedd sesiynau trafod ar Hanfodion Gofal Diogel (a oedd yn cynnwys Gofal sy'n Canolbwyntio ar yr Unigolyn, Arweinyddiaeth, Dibynadwyedd, Cyfathrebu a Gwaith Tîm). Yn ogystal, cafwyd sesiynau meithrin sgiliau gan Academi Gwelliant Cymru a Labordy Q Cymru.
Dywedodd John Boulton, Cyfarwyddwr Gwelliant Cymru, “Diolch i bawb a fynychodd ac a gyfrannodd at y gynhadledd eleni. Cawsom ein difetha gan gyfres gyson o siaradwyr gwych yn cyflwyno sesiynau rhagorol. Rydym yn edrych ymlaen at gynllunio'r nesaf.”
Gwyliwch y gofod hwn am ragor o wybodaeth gan gynnwys dyddiad Cynhadledd Genedlaethol Gwelliant Cymru 2023. Os oes gennych unrhyw ymholiadau pellach, anfonwch e-bost atom yn improvementcymru@wales.nhs.uk
I gael rhagor o wybodaeth ac i gael yr wybodaeth ddiweddaraf am Wobrau GIG Cymru, ewch i gwobraugig.cymru